Nagkatol ang tiil

Niadtong Oktubre 27, walo ka adlaw sa wala pa moigo sa Sugbo ang bagyong Tino, nahibawo nang grupo nilang Kongresista Duke Frasco sa nag-ung-ong nga katalagman. Dili sila makapalusot nga nalipat sa balita kay usa sa ilang kauban nihukom sa dili pagdayon aron mangulo sa iyang munisipyo sa pagpangandam.

Ebidensiya ang suwat ni Borbon Mayor Nico Dotillos nga niawhag ni Gobernador Pam Baricuatro sa pagkanselar sa iyang travel authority tungod sa bagyo. Bisan sa kasayuran nga mahimong maigo ang distrito, silang Frasco ug kaubanan niinsistir sa pagpadayon sa ilang laag.

-o0o-

Tuod man, nitugpa g’yud sa Borbon si Tino sa alas-5:10 sa kadlawon sa Nobyembre 4. Sakto ang kabalaka ni Dotillos. Maong wala mahikawi ang mga molupyo sa iyang presensiya ug liderato sa pagpaneguro nga dili sila mahiagom sa dakong kadaot.

Nahibawo silang Frasco sa pagtugpa nang Tino sa Sugbo atol sa ilang layover sa Dubai sa wala pa sila mobalhin og ayroplano para sa London. Dili sila makapa aron ingnon nga wala kabalita. Kay duna silay kauban nga, sama ni Dotillos, nihukom sab sa dili pagdayon sa biyahe.

-o0o-

Si Compostela Mayor Jury Quiño nitug-an nga sa Dubai siya nahibawo nga dako ang kadaot ug daghan ang nangamatay sa iyang lungsod maong nipili sa pagbalik sa agi. Niangkon siyang niabot sa munisipyo pila ka oras human sa pagbiya ni Tino ug nagkatagbo pa silang Gobernador Baricuatro.

Kon nahibawo si Quiño sa pagkaigo sa Compostela, lisod tuohan nga wala magpakisayod si Frasco sa mas dakong kadaot ug mas daghang nangamatay sa Liloan. Pero nagpaugat pagpadayon sa laag.

-o0o-

Ilang pag-isnab sa panagana ni Dotillos ug paglingiw sa pagpakabana ni Quiño nagmatuod nga walay gugma ug simpatiya sa mga biktima. O mas lami g’yung katol sa ilang tiil nga naghigwaos pagtaak sa langyawng yuta. Nagdalidali sila og pauli dili tungod sa kaluoy sa mga namatyan o sa mga nawad-an og mga balay ug panginabuhi.

Kon dili tungod kay kinahanglan silang mosugat ni Presidente Ferdinand Marcos Jr. nga nibisita sa Liloan niadtong Nobyembre 7. Maong dili ikahibulong nganong sipa kaayong pakpak sa taga Liloan pagkahibawong imbestigahon ang ilang pakauwaw sa Department of the Interior and Local Government.