Tunglo sa baha

Dili sama kadako ang kadaot sa mga poste ug linya sa kuryente sa bagyong Tino niadtong Martes kon ikumparar sa bagyong Odette sa 2021. Kay mas hinay mang hangin ni Tino dili sama kadaghan ang mga poste nga nangatumba. Pero tibuok Metro Cebu gihapon ang apektado tungod sa mas lapad nga baha.

Lahi sa Odette, gipasalig nga dili maabtan og kapin sa buwan ang pagpabalik sa koneksiyon sa tanang kabalayan. Sama sa Odette, kuwang ang mga trabahante sa Visayan Electric para sa mas paspas nga pagsubay ug pag-ayo sa tanang linya.

-o0o-

Paglurang sa bagyo niadtong Martes sa buntag, unang gihimo sa Visayan Electric mao ang pagpabalik sa tanan nilang substations. Kay mao man ang agian sa suplay sa tanang siyudad ug lungsod sa ilang franchise area.

Napabalik dayon ang tanang substations, gawas lang sa Liloan. Kay ang labing importante nilang kahimanan nalumos ug naguba sa lapad nga baha. Nga nakatanggong sulod sa pila ka oras sa mga nagpuyo sa labing ubos nga mga lugar sa pagsaka sa ikaduhang andana ug pagkatkat gyod sa atop sa ilang kabalayan.

-o0o-

Nisamot ang problema sa Visayan Electric kay naigo sab sa baha ang ilang subcontractors. Mao nga limitado ang ilang kapasidad, ang uban na-inutil tungod sa pagkagusbat sa ilang mga ekipo.

Usahay makalimtan nato nga ang public utilities, sama sa Visayan Electric, Metro Cebu Water District (MCWD) ug telecommunication companies, gipalihok sa mga tawo nga dili kublan sa bagyo, baha, linog, dahili sa yuta ug ubang katalagman.

-o0o-

Ang grabeng kahasol sa mga linya sa kuryente ug komunikasyon maoy usa sa mga rason sa kampanya paglubong sa yuta sa mga koneksiyon sa tanang public utilities. Gi-garantiya nga ang dakong gasto sobra pa sa matapakan sa mas dakong bentaha kay dili na masakripisyo ang mga panginabuhi ug nga negosyo.

Pero ang kalapad ug kalawom sa baha tungod sa P1.2 trillion flood control scandal ug ang pagpabaya sa gobyerno sa climate change makapasulbong sa kahadlok. Nga mahagsa ang bisan unsang pagsuway sa kalamboan. Kon dili mabadlong, kay tradisyonal nga mga politiko ug vote buying gihapon ang modominar sa eleksiyon, ang walay kinutoban nga pagpangawat ug pagpataka sa mga nagtungkawo sa gahom.