Liderato ni Pam
Dihang nipakita sa Cebu Gov. Pam Baricuatro sa Bogo City sa sayong buntag niadtong Miyerkules, pila lang ka oras human sa kusog sa linog nga nikalas na og dul-an sa gatos ka kinabuhi, walay nahibawo unsay iyang mahimo. Limitadong komunikasyon mahimong makahasol sa pagdumala sa krisis.
Pero naluwas ang mga natabonan, natambalan ang mga samaran ug nahipos ang mga patayng lawas. Salamat sa iyang pagpalambo sa Bogo ug Danao ug ubang provincial ug district hospitals ug pagtabang sa Vicente Sotto Memorial Medical Center (VSMMC) ug University of Cebu Medical Center (UCMed).
-o0o-
Samtang nangunay pagsusi sa kadaot sa linog, gipirmahan niyang executive order nga gidasonan dayon sa Provincial Board pagpaubos sa probinsiya sa state of calamity. Napalihok niyang burukrasya sa Kapitolyo ug ubang local government units sa paghatod dayon sa mga hinabang.
Labaw sa tanan, nadasig niyang mga Sugbuanon pagmatuod nga sa panahon sa dako ug dinaliang panginahanglan, sama sa gihimo sa ilang mga ginikanan human sa Ruping sa 1990 ug Yolanda sa 2013, nagkahiusa sa pagtanyag sa dili malabwan nga kamanggihatagon ngadto sa labing lisod, labing masakiton ug labing gipanggutom.
-o0o-
Mao nga hangtod sa pagtugpa sakay sa C130 cargo plane sa Philippine Air Force sa mga sakop sa Gabinete ni Presidente Ferdinand Marcos Jr. wala mabatyagi sa mga Sugbuanon ang kakuwang og tabang gikan sa nasudnong gobyerno sa kapin sa 12 ka oras human sa linog.
Salamat sa hilom nga presensiya ni Baricuatro sa Bogo. Walay pasakalye. Walay banda. Walay paukyab. Walay pangasaba, panginsulto, ug panghudlat. Gawas sa mas lanog nga mensahe sa matinud-anong pag-unong.
-o0o-
Maong walay laing nahimo silang Defense Secretary Gibo Teodoro, nasudnong chairman sa National Disaster Risk Reduction and Management Council (NDRRMC), Department of Public Works and Highways (DPWH) Secretary Vince Dizon, ug Department of Social Welfare and Development (DSWD) Secretary Rex Gatchalian.
Gawas sa pagsunod ni Baricuatro sa Bogo. Kay bisan dili alyado sa Malacañang, siyay labing unang nipakita ug nagpabilin uban sa mga biktima. Iyang mga limitasyon sobra pa sa natapakan sa nagpakabana nga mga Sugbuanon. Bisan ang labing gagmayng ug labing batan-on nila niboluntaryo sa ilang panahon, ug katakos ug kataposang hiniposan. Para sa mas nagkinahanglan.
- Latest
