Kanus-a pa makat-on
Ang kadaghan sa nangamatay sa kusog nga linog sa amihanang tumoy sa Sugbo niadtong Martes sa gabii nagmatuod nga wala ma-leksiyon ang mga opisyal sa gobiyerno sa importanteng mga pagtulon-an sa duha ka nagsunod nga katalagman niadtong 2013, ang makalilisang nga linog sa Oktubre 15 ug ang super typhoon Yolanda sa Nobyembre 8.
Imbes palig-unon ang mga istruktura (build back better) ug ipahimutang ang mga molupyo sa mas luwas nga mga lugar (gawas sa danger zones), gitugotan sa mga ahensiya ang padayong paglawog sa mga biktima ngadto sa kabangis sa kinaiyahan.
-o0o-
Apil sa nihagsa atol sa Magnitude 6.9 nga linog mao ang balay (nga gipasalig nga makasugakod og mas kusog pang bagyo) sa Yolanda Village a Bogo City, nga nipatay sa tanang sakop sa pamilya, ug sports complex (nga gi-desinyo sab isip lig-on nga evacuation center) sa San Remigio, nga niangin sa nag-ensayo nga mga atleta.
Kon nihagsa ang mga istruktura nga panagang unta sa mga katalagman, unsay dag-anan sa kinapobrehang mga biktima kansang kita igo rang ikapalit sa labing baratuhong mga dapat aron lang may matawag nga ilang mga payag?
-o0o-
Nakalingkawas sa linog pero wala kabentaha ang taga isla sa Bantayan. Human sa Yolanda, gipabalhin sa mas luwas nga mga lugar. Aron dili na malumsan sa storm surge ug dili na masabak sa kinakusgang hampak sa hangin.
Pero dili matukod ang relocation site sa dili titulado nga mga luna. Maong gipasalig sa mga kongresista ug mga senador ang dinaliang pag-reclassify sa kabahin sa isla. Pero nalipat tingali sa mas daghang kawatunon, wala malihok ang balaudnon hangtod karon.
-o0o-
Human sa pagbangotan, lab-ason ang mga saad sa pagpabarug og mas lig-on pa gyod nga mga istruktura sa mas luwas pa gyod nga relocation areas. Hinaot pakapinan sa tinuod nga pagpa-titulo sa mga yuta, tukoran og kadalanan ug taoran og suplay sa tubig ug kuryente ug palibotan og makiangayon nga mga panginabuhi.
Aron nga ang mga biktima duna nay lehitimong kapilian. Gawas sa pagbalik sa pagsugal sa ilang naandang mga pinuy-anan. Diin imbes maningkamot sa pagtuman sa ilang mga pangandoy, hasulon ra sa kahigwaos pagpangaliya nga unta makatsamba na paghaw-as gikan sa tunglo sa katimawa.
- Latest
