Nagkinto si Marcos
Kon dunay nagplano og pribadong konsiyerto sa Duran Duran, o ni Eric Clapton, o sa ubang paborito ni Presidente Ferdinand Marcos Jr. sa iyang ika-68 nga birthday niadtong Sabado, gitambagan tingali pagkanselar sa kalihokan. Kay dili mahimong mag-usik-usik si Marcos og minilyon ka pesos, sama sa iyang gihimo sa niaging tuig, atubangan sa nasudnong kasuko sa kinawatay sa iyang flood control projects.
Namenosan sang tentasyon kay layo ang venues sa Formula One World Championship karong buwana (Italya, Septiyembre 5-7) ug Azerbaijan, Septiyembre 19-21). Ug sunod buwan pang Singapore, Oktubre 3-5.
***
Nagkinto ang presidente atubangan sa nagkalapad nga mga protesta batok sa pangurakot. Human gipalayas ang ilang pamilya sa Malacañang sa EDSA Peope Revolution niadtong 1986, gikuyawan siya sa mga implikasyon sa pagtapok sa usa ka milyon ka demonstrador sa Trillion Peso March karong Septiyembre 21, ang ika-53 nga anibersaryo sa deklarasyon sa martial law nga nisugod sa diktadura sa iyang amahan nga si Ferdinand Marcos Sr.
Siyay labing nahibawo nga bisan gamayng sipyat mahimong mopasilaob sa kagubot. Sama sa nag-unang mga protesta batok sa pangurakot sa Indonesia ug Nepal.
***
Wala mag-inusara si Marcos sa iyang kahadlok. Taga Department of Public Works and Highways wala na mosul-ob sa ilang uniporme. Mga sakop sa Kongreso nihipos sa mga sakyanan nga dunay special license plates (No. 7 sa mga senador ug No. 8 sa mga kongresista).
Kontrobersiyal nga kontraktor nga nagpuyo sa subdivision sa Cebu City nagpakitabang sa mga polis pagdugang sa seguridad, luxury cars wala iladlad sa garahe ug sa sinemanang misa wala igkita uban sa signature bag.
***
Maong napugos si Marcos pagtukod sa Independent Commission for Infrastructure (ICI), pagtudlo sa dili niya mga alyado isip mga imbestigador ug paghatag nila og gahom pag-imbestigar sa tanang opisyal sa gobyerno, apil nang iyang mga paryente, kon dunay mga ebidensiyang nakaapil sa eskandalo.
Hinaot nga nakaamgo nang katawhan nga sila ang labing gamhanang puwersa sa nasud. Hinaot nga dili nila hunongan sa pagpaningil ang kurakot nga mga opisyal. Hinaot nga bantayan nga dili molikoy ang ICI. Ug panalipdan ang kaligdong sa imbestigasyon gikan sa posibleng pag-sabotahe kon ang mga ebidensiya mopuntirya na sa kinadak-ang mga buaya.
- Latest
