Limsi og kauwaw
Among inadlaw’ng programang “Baruganan” sa YouTube dunay segment nga “EOTD: Epal of the day” (gikan sa sugyot sa viewers) nga mohingalan sa mga politiko nga namugos sa pagbutang sa ilang mga nawong ug mga ngalan sa tarpaulins sa mga proyekto sa gobiyerno.
Tampo sa viewers ang segment. Pinasikad sa mga letrato o video nga maagian sa inadlaw’ng biyahe gikan ug paingon sa ilang mga pinuy-anan, trabahoan, eskuylahan ug ubang destinasyon. Hinaut nga magpadayon ang pagpakabana sa mga magbubuhis pag-ila ug pagsaway sa mga politiko ug ubang mga kawatan og kredito.
-o0o-
Dili tuyo sa segment ang pagpakauwaw. Kon dili ang pagpaningil sa mga nakuhaan og resibo sa ilang kalapasan. Gipasikad ang segment sa tulo ka mga lagda nga pulos nagdili sa pagbutang sa mga ngalan, nawong, initials, simbolo, logo, o motto sa mga opisyal sa gobyerno (pinili o tinudlo) sa mga notisya sa mga proyekto ug kabtangan nga gigastohan sa buhis sa katawhan:
Department of the Interior and Local Government (DILG) Memorandum Circular No. 2010-101;
Commission on Audit (COA) Circular No. 2013-004; ug
General Appropriations Act (GAA) sa 2025.
-o0o-
Niang topnotchers sa mga epal:
Mayor Cindi Chan, Kongresista Ahong Chan, Barangay Kapitan Daday Chan ug ubang lokal nga mga opisyal nga nipapilit sa luod nilang mga nawong sa hapit tanang eskina sa Opon;
Kongresista Duke Frasco, Tourism Secretary Christina Garcia Frasco ug Mayor Aljew Frasco nga nibandera sa nagkalata nilang mga dagway sa hapit tanang poste sa Liloan; ug
Kongresista Lolypop Ouano ug Mayor Jonkie Ouano nga nibandilyo sa puol nilang mga nawong sa hapit tanang proyekto sa Mandaue.
-o0o-
Ang maayong balita mao nga dili sama kadaghan ang mga epal sa ubang mga lungsod ug mga syudad sa Sugbo. Manghinaot ming dili manakod sa uban pang mga politiko ang nangalisbo nga kagaw sa ka walay kaikog sa mga Chan, mga Frasco ug mga Ouano.
Mas dako namong panghinaut nga mapapas na ang segment sa mosunod nga mga adlaw. Nga wala nay bag-ong maletratohan ug ma-videohan nga mga epal. Nga tugkan na og uwaw ang mga Chan, mga Frasco ug mga Ouano sa pagpangilog sa mga proyekto nga gikan sa kahago sa mga Sugboanon.
- Latest
