Pagluwas sa Bantayan

Karong gisuspenso na sa Department of Environment and Natural Resources (DENR) ang Environmental Compliance Certificate (ECC) sa The Stria building sa Sta. Fe sa Bantayan, mahukasan na ang tanang pagpaka aron ingnon nga tinarong ang proyekto.

Nabantang na g’yud ang kahilas sa pangangkon sa tag-iya sa building, ang Fifth Avenue Property and Development Corp. nga gipangulohan ni kanhi presidential assistant Michael Dino, nga sila ray magbuot unsa nga mga balaod ang ilang tumanon. Dili diay kapasalipod sa ilang titulo sa yuta sa pagyatak sa mga lagda sa pagpanalipod sa kinaiyahan.

-o0o-

 Laing manlipaghong kauwaw, kana kon madutlan pang kabaga sa ilang nawong, mao ang lokal nga mga opisyal sa Sta. Fe. Kinsa imbes mangayo og pasaylo sa pagbadlong sa kalapasan ni Dino nitabang pa og dupa sa pakauwaw.

Ambot unsang putos sa buwad ang ilang nasaypan nga ECC gikan sa Environmental Management Bureau (EMB) sa DENR nga gibasehan paghatag nilang Dino og building permit pagtukod sa 11 ka andanang building. Kon wala siyay apil sa binuang, angayng palagputon ni Sta. Fe Mayor Tamar Espinosa ang mga nilipat niya sa transaksiyon.

-o0o-

Pero ang labing dakong kauwawan angayng ihilam-os sa DENR. Inutil sa pag-isnab ni Dino sa ilang mga notisya sa kalapasan: Wala kakolekta sa ?270 mil nga multa human sa sunudsunod nga Notices of Violation sa Hulyo 31, Septiyembre 17, ug Disyembre 18 sa niaging tuig ug sa pagpahunong sa konstruksiyon niadtong Mayo 14 ning tuiga.

Ambot duna bay mahimo kon pikatan gihapon nilang Dino ug kakonsabong mga opisyal sa munisipyo ang pagbakwi sa ECC.

-o0o-

Daghang salamat sa wala pagtalaw sa mga molupyo sa Bantayan ug sa environmental groups sa pagpabaha sa social media sa kusganong pagsupak sa The Stria nga giisip nga dakong hulga sa mga kinabuhi ug katigayonan sa isla.

Laing nakatabang sa kalit nga pagpangisog sa mga opisyal sa DENR, human sa taas nga panahon nga pagtak-om ug paglikay sa mga pakisusi sa mga sakop sa media: Napalayas na sa puwesto ang labing bagis nga tigdupa ni Dino. Nga gipasanginlang nitabang sa mga maniobra ug sa paghudlat sa mga opisyal ug ahensiya sa gobyerno nga nisuway pagkuwestiyon sa proyekto.