Dumot sa mga ospital
Ambot may makalabaw ba sa kabaho sa kabilin ni kanhi gobernador Gwen Garcia sa mga Sugbuanon: 17 ka ospital sa probinsiya ang iyang gipasagdan. Puno sa upat ka provincial hospitals ug 12 ka district hospitals nga iyang gi-inutil, ang Liloan Children’s Hospital (LCH) iya sang gi-isnab.
Lisod sabton nga gisakripisyo ang natukod nang mga ospital kay dili ganahang mangopya ni kanhi gobernador Junjun Davide nga nipalambo sa health services. Mas lisod tugkaron nganong gipasagdan ang ospital nga gitukod sa balaod nga gipanghambog sa iyang kaugalingong umagad nga si Kongresista Duke Frasco.
***
Ambot unsay atraso sa bana sa iyang anak. Pero si Frasco ang amahan sa iyang mga apo. Nabisto nga bakak diayng pangangkon nga siyay inahan sa Sugbo. Kay giihikawan sa mga tambal ang kabos ug masakiton nga kabataan.
Ambot nasuko ba lang nga nagpasikat si Frasco sa Kongreso. Nga igo rang nipasa sa Kapitolyo sa gasto sa pagtukod og operasyon sa LCH. Pero dakong eskandalo nga ang kinadatoan nga probinsiya wala kahatag bisan usa ka dako para sa LCH sa pinaburot niyang budgets sa 2023, 2024 ug 2025.
***
Ang pagsukwahi niya sa balaod sa LCH nasumpay sa pagsupak sa suspension order sa Office of the President sa 2012, dismissal order sa Ombudsman sa 2018, suspension order sa Ombudsman sa Abril 2025 ug sa hukom sa mga Sugbuanon niadtong Mayo 12 pagpalayas niya sa puwesto (pinaagi sa pagprotesta bisan walay ebidensiya sa kadaogan ni Gobernador Pam Baricuatro).
Nitakdo sab sa iyang pag-una sa mga paukyab sa Suroy-Suroy ug Pasigarbo kay sa batakang mga serbisyo.
***
Dili ba kapasanginlan si Garcia og kriminal nga pagpabaya? Dili ba mabasol ang iyang paglaslas sa budget ug pagtaktak sa mga espesyalista sa kamatayon sa mga pasyenteng nabalibaran sa mga ospital sa Kapitolyo? Dili ba makapalig-on sa pasangil ang pag-downgrade sa Department of Health sa 10 sa 12 ka district hospitals ngadto sa pagka infirmary?
Dili kalusot si Garcia nga walay kuwarta ang Kapitolyo para sa mga ospital. Kay dayong biya iyang giwara-wara ang ?6 bilyones nga savings (nga naglakip diay sa gipakatulog nga ?2 bilyones para unta sa edukasyon ug katalagman ug bayad sa iyang gibiyaan nga mga utang).
- Latest
