Dugang ibisto ni Pam

Human nabisto ang mga pakauwaw ni kanhi gobernador Gwen Garcia --sama sa pagpakatulog sa duha ka bilyon ka pesos nga para unta sa pagpalambo sa edukasyon ug pagsagang katalagman, paghimong fire hazard sa Kapitolyo ug pag-inutil sa mga ospital-- unsa may dugang ibutyag ni Gobernador Pam Baricuatro sa iyang State of the Province Address (SOPA) karong Agosto 28?

Nagkinahanglan ang administrasyong Baricuatro og igong panahon sa pagsubay sa tanang transaksiyon, pagsubli sa tanang papeles ug pagkuha sa testimoniya sa mga saksi. Pero human sa kapin sa buwan sa puwesto, andam na ba si Baricuatro sa pagpahibawo sa mga Sugbuanon sa pasiunang mga eskandalo nga ila nang na-dokumento?

Ilhon na ba niya kinsa ang utok sa sindikato nga nagkontrolar sa negosyo sa bas ug graba, apil nang kakonsabo sa Kapitolyo, nga nakahimo sa gastohan sa konstruksiyon sa Sugbo nga maoy kinatas-an sa nasud, labaw pa sa Metro Manila?

Ilhon na ba niya ang mga gipanghatagan ni Garcia og quarry permits, nga naglakip sa paboritong mga negosyante ug suod nga mga alyado sa politika, nga gipasanginlang niguba sa kinaiyahan?

Ibisto na ba niya kinsa ang nag-apura sa pag-upaw sa bukid sa Cambuhawe, Balamban, aron paghawan sa agianan paingon sa gipamugos nga bag-ong Capitol building (nga salamat sa kapildehan ni Garcia dili na mahinayon)?

Ipahibawo na bang pagka suspenso sa gipasanginlan nga nagpabaya nga doctors, nurses, ug mga tagdumala sa mga ospital nga namatyan og mga pasyente atol na sa iyang administrasyon?

I-detalye na bang tanang wala kinahanglana nga mga kamatayon sa mga pasyente nga wala maluwas sa provincial ug district hospitals tungod sa gipasiugdahan ni Garcia nga pagtaktak sa mga espesyalista ug ubang healthcare workers ug walay kukaluoy nga paglaslas sa budget sa health services?

Nganlan na ba niya kinsa ang tinuod nga niburot sa minilyon ka pesos nga kita sa turismo sa mga butanding sa Oslob, nga gipasanginlang mas dako og paak kay sa binahinay nga gisuwat sa papel tali sa munisipyo, barangay ug mga mangingisda?

Iladlad na ba niya sa publiko ang listahan sa mga kontraktor, mga negosyante ug ubang suppliers nga naningil sa ?450 milyones nga utang nga gibilin ni Garcia sa bag-ong pamunoan?