Walay gugma sa Sugbo

Unsa katig-a ang kasingkasing nga nipakatulog sa kapin sa bilyon ka pesos nga makatabang unta pagsulbad sa problema sa kakuwang og kapin sa 3,000 classrooms ug 1,000 ka magtutudlo sa mga eskuylahang publiko sa Probinsiya sa Sugbo?

Unsa kapating ang tanlag nga igo rang nanghatag og notebooks ug school supplies nga gibutangan sa iyang dagway bisan duna untay katakos sa pagpagaan sa kalbaryo sa mga bata nga nagkutoy ang tiyan nga nisulod nga nag-sinardinas sa ilang classrooms puno sa naandan nga kakuwang sa mga libro ug mga lingkoranan?

-o0o-

Katig-a ug kapating ray posibleng katin-awan nganong nakaako si kanhi gobernador Gwen Garcia sa pagyaka sa ?1.1 bilyones nga Special Education Fund (SEF) nga dako unta nga tabang pagtukod og classrooms, pag-hire og mga magtutudlo ug pagpa-pamahaw sa tanang gipanggutom nga mga tinun-an sa public schools sa iyang gipasigarbo nga kinadatoan nga probinsiya sa Pilipinas.

Nakatulog ba siyang naghayang sa pagpaantos sa mga bata ug mga magtutudlo kay gipalabi ang pagpaburot sa kuwarta nga gisugo sa balaod nga gastuhon para sa labing dinalian nga mga panginahanglan sa edukasyon?

-o0o-

Mas makapasubo nga wala mag-inusara si Garcia. Gitabangan siya nilang Board Member Raymond Calderon, chairman sa education committee, ug ubang mga sakop sa Provincial Board nga nagpiyong nga ni-aprobar sa tinuig niyang budget.

Nagkonsabo sab sila paglumlom sa bilyon ka pesos nga nakatabang unta pagpangandam ug pagtabang sa mga biktima sa katalagman sa nangaging katuigan. Puno sa ilang pagtunglo sa kabos nga mga pasyente pinaagi sa pag-inutil sa 16 ka provincial ug district hospitals.

-o0o-

Magpasalamat na lang ta nga dunay mga balaod nga nagdili sa paggasto sa SEF ug disaster funds sa laing katuyoan. Bisan sa katihik ni Garcia sa batakang mga serbisyo pagpalambo sa kahimsog ug edukasyon ug pagbatok sa katalagman, peligrong nabasiyo ang panudlanan.

Kay sa kinatibuk-an niyang pagtungkawo sa Kapitolyo, si Garcia wala mopakita og gugma sa Sugbo. Mas ganahan siyang nigasto para sa mga kumbira, sayaw-sayaw, ug paukyab. Inabagan sa board members ug department heads nga nagtibangay sa pag-ulog-ulog nga siya ang labing bantogan sa tanang mga pangulo sa kasaysayan sa Sugbo.