Pagkausab ni Leonen
Ang pagsuwat ni Supreme Court Senior Associate Justice Marvic Leonen sa kontrobersiyal nga desisyon nga nagbasura sa articles of impeachment nga gipasaka sa House of Representatives batok sa bise presidente dili maoy unang higayon nga nidapig siya sa mga Duterte.
Gisuportahan sab niyang pagbiya ni kanhi presidente Rodrigo Duterte sa International Criminal Court niadtong 2018. Sa oral arguments sa petisyon nga nagkuwestiyon sa legalidad sa withdrawal nga wala dasoni sa Senado, gipasanginlan si Leonen nga nilawog og mga tubag ni kanhi solicitor general Jose Calida pagpalig-on sa baruganan ni Duterte.
***
Si Leonen nabantog sa kaisog nga pagsaway ni Duterte sa unang mga kaso sa administrasyon. Gipasidan-an gani niya ang Korte Suprema sa dili paghimo ni Duterte nga diktador pinaagi sa pagpatigbabaw sa legalidad sa martial law sa Mindanao.
Pero parte sa ICC, hingpit nga gisuportahan ni Leonen si Duterte. Pipila sa iyang mga argumento: Mauwawan ang Pilipinas kon mobalik sa ICC human nigawas; walay klarong probisyon sa Rome Statute nga nagtugot sa pagbalik sa mga nasud nga nibiya; dili angayng manghilabot ang Korte Suprema sa klaro nga political question.
***
Sa pag-awhag nga tahuron ang pagbiya ni Duterte sa ICC, gipahinumdoman ang iyang kaubanan sa Korte Suprema sa dili pagpadala sa tentasyon sa pagdiktar unsay angayng himuon sa gobyerno pinaagi sa ilang mga desisyon.
Nipahinumdom siya nga angayng hatagan og kagawasan ang mga politiko sa paghimo sa ilang trabaho kay pinili sila sa mayoriya sa mga botante pinaagi sa eleksiyon. Samtang silang mga mahistrado dili makapangangkon og bisan unsang mandato gikan sa katawhan.
***
Ang pasidaan ni Leonen niadtong 2018 batok sa paghimo sa mga mahistrado nga judicial dictators mosumbalik sa ilang desisyon niadtong Biyernes nga nipahamtang og bag-ong mga panginahanglan sa impeachment proceedings nga wala hisguti sa 1987 Constitution.
Nausab ba lang ang panghunahuna ni Leonen sa pagtinahuray sa mga sanga sa gobyerno? Padayon kong naglaom nga nagpabilin ang kaligdong nga iyang gihuptan sukad gitudlo ni anhing presidente Noynoy Aquino sa Korte Suprema niadtong 2012 (dihang 49 anyos pa siya) nga nihimo niyang labing batan-on nga mahistrado sukad sa 1938. Pero dunay mga pasangil nga inanay na siyang nalamoy sa mga maniobra sa labawng hukmanan.
- Latest
