Kinakusgang panihapon

Ang kinakusgang panihapon nilang Cebu Governor Pam Baricuatro ug Cebu City Mayor Nestor Archival uban ni Bise Mayor Tommy Osmeña isip kusinero niadtong Domingo nihatag sa mosunod nga mga mensahe nga mas sipa kay sa bisan unsang press conference o memorandum of agreement:

Dili diay bunga lang sa hilanat sa talagsaong kadaogan batok sa mas lig-on nga incumbents ang ilang saad sa pagtinabangay, seryuso g’yud tingali kay nagsige pa man og tagbo ug istorya bisan nahuwasan na duha ka buwan human sa eleksiyon;

Kon tinud-on ang ilang pasalig, masulbad nang pila ka dekada nga kalangay sa Cebu Bus Rapid Transit project (hinaot duna pay igong panahon nga makabuylo ug dili maapsan sa paghupas sa utang sa World Bank sa Septiyembre sa sunod tuig);

Kon tumanon ang ilang saad, mapahimutang nang kaliboan ka mga molupyo sa mga luna sa 93-1 nga maka-benepisyo na unta sa land swap deal nilang Osmeña ug kanhi gobernador Junjun Davide niadtong 2018 sa wala pa lawgawa ni kanhi gobernador Gwen Garcia pagpuli niya sa Kapitolyo sa 2019;

Kon molambo ang pagsinabtanay, mabadlong nang mga binuang sa Metro Cebu Water District nga maoy nakapasamot sa kanihit sa suplay ug kamahal sa presyo sa tubig sa Metro Cebu kay mga representante sa City Hall ug Kapitolyo ang mga sakop sa MCWD board;

Ilang panaghiusa makabanhaw sa paglaom nga makabangon ang Sugbo, sama sa pagbarug human nahagba sa bagyong Ruping niadtong 1990, ug makab-ot ang lapad nga kalamboan (nga dili lang para sa mga politiko ug ilang alyadong mga negosyante kon dili para sab sa labing kabos ug masakiton nga mga Sugbuanon);

Mahimong mas makiangayon ang turismo kay dili na bunalan og makapatagam nga mga bayranan ang mga turista ug dili na ribalan ang Sinulog og inimbento nga mga kanta ug sayaw nga mga tigpasiugda ray ganahan; ug

Makalahutay ang panaghigalaay kon masundan og panihapon nga si Pam nay kusinera sa North Town Homes sa Cabangcalan ug lain pa g’yung panihapon nga si Nestor ang kusinero sa Talamban (maglaway ang mga kaatbang dili lang sa mga putahe kon dili sa mas dakong kahigayonan nilang Pam ug Nestor nga masublian sa 2028).