Palasyo ni Gwen

Para ni kanhi gobernador Gwen Garcia, iyang palasyo ang Kapitolyo. Diin nagpatuyang siya sa paghimo og mga kumbira, abunda sa pagkaon ug inom nga binayran sa buhis sa mga Sugbuanon, para sa mga negosyante ug suod nga mga higala nga bugtong pasaporte mao ang ilang kinakusgang ulog-ulog niya.

Kapitolyo say iyang gihimong dawatanan sa nasudnong mga politiko nga ni-amen kay nituo sa pangangkon nga siyay nagkontrolar sa 3.4 milyones ka rehistradong mga botante sa Sugbo. Pero wala siya magbutang og fire exits.

***

Gigamit sab ni Garcia ang Kapitolyo isip kahimanan sa pagsabotahe sa iyang mga kaatbang. Niinsistir nga heritage site ang Kapitolyo maong dili mahimong tukoran og bus station sa Cebu Bus Rapid Transit, nga giduso nilang kanhi Cebu City mayor Mike Rama ug Bise Mayor Tommy Osmeña, kay matabonan ang iyang panglantaw paingon sa Fuente Osmeña.

Pero pagarpar ra diayng pagpanalipod sa heritage. Kay wala magtagad pagpreserbar sa Kapitolyo pinaagi sa pagtaod sa fire extinguishers ug fire alarm system.

***

Nagpasalipod sab si Garcia sa Kapitolyo aron pagsupak sa lehitimong mga sugo sa pagsuspenso niya. Nagbarikada siya og 42 ka adlaw sa iyang opisina sugod sa Disyembre 2012 hangtod sa Enero 2013 pagsukol sa suspenso nga gisugo sa Malacañang.

Nikapyot sab siya sa Kapitolyo pagsukwahi sa preventive suspension order sa Ombudsman niadtong Abril ning tuiga. Pero wala siya kakita og panginahanglan sa pagbutang og first aid kits para sa medical emergencies.

***

Bisan sa pagpahimulos ni Garcia sa Kapitolyo para sa tanan niyang mga kapritso, wala siya magtagad sa pagseguro nga magpabiling luwas ug limpiyo ang istruktura. Bisan tungod na lang sa kaikog, kon wala may luna sa iyang kasingkasing ang pagpasidungog, sa usa sa labing bantogan ug makasaysayanon nga simbolo sa Sugbo.

Labaw sa tanan, ang aktuwal nga mga binuhatan ug mga sinultihan ni Garcia, nga siya ang labing hawod ug nga siyay labing nahibawo unsay makaayo sa Sugbo ug mga Sugbuanon, dakong tamparos sa higanteng mga titik nga gipatik sa bantayog sa Kapitolyo dungan sa pagtukod niini niadtong 1937: Ang gahom sa goybyerno nanukad sa katawhan (The authority of the government emanates from the people).