Gasa nga dili libre
Dakong opisyal sa gobiyerno nga bag-o lang napili sa puwesto malipayon nga nipasalamat pinaagi sa social media sa mahalon nga mga butang nga iyang nadawat isip libreng mga gasa gikan sa iyang mga higala. Ambot nganong walay nakatambag niya nga:
Gidili sa Code of Conduct and Ethical Standards for Public Officials and Employees (RA 6713) ang pagdawat og gasa nga posibleng makaapektar sa pagtuman sa ilang trabaho; ug
Walay gasa nga libre kay mahimong gamiton sa naghatag aron pagpangayo og pabor ug posibleng rason nga ang opisyal maikog sa pagbalibad.
* * *
Napahinumdoman dayon ang opisyal sa komplikasyon sa kamanggihatagon ug kamatinabangon sa iyang mga higala. Dihang gireklamohan nga responsable sa dakong kahasol sa publiko ang duha ka kompaniya nga gika-transaksiyon sa ahensiya sa gobyerno nga iyang gipangulohan:
Ang unang kompaniya, nga gidudahang kakonsabo sa panguwarta sa iyang politikanhong kaatbang, gipasidan-an dayon nga kon dili usbon ang kuwestiyonableng mga probisyon sa ilang kontrata mahimong makanselar ang transaksiyon; pero
Ang ikaduhang kompaniya gipanalipdan dayon niya gikan sa mga pagsaway kay, nakatag-an ka, gipanag-iya diay sa suod nga higala sa suod niyang higala.
* * *
Angayng sublion ang kontrata sa unang kompaniya. Dili tungod sa pagduda nga sikit sa iyang kontra kon dili aron pagpanalipod sa interes sa mga magbubuhis. Sa samang paagi, angayng tun-an ang kontrata sa ikaduhang kompaniya bisan maikog sa suod niyang higala.
Hinaot nga ang opisyal nabag-ohan lang. Nga kon makapahimutang na og tarung sa puwesto, ug mapasabot sa mga nag-una niya sa duyan, makahibawo na unsaon pagbalibad sa gipatuong libre pero duna diay higot nga mga gasa aron paglikay sa wala kinahanglana nga bakikaw nga mga sitwasyon.
* * *
Makatabang sab kon may makasulti niya nga human nang eleksiyon. Nidaog na siya. Napalayas nang iyang kontra. Maong undangon na ang pagpanungog. Hunungon nang pagpasigarbo sa kadaghan na sa mga nisuporta niya (nga naglakip sa bag-o niyang mga higala nga labihang sipsipa sa iyang kontra sa wala pang eleksiyon).
Makaayo sa tanang hingtungdan nga mobuylo na sa pag-alagad sa katawhan. Dili aron pagpakauwaw sa iyang kontra. Kon dili aron pagtuman sa tahas sa tarung nga opisyal sa gobiyerno: Pagpatigbabaw sa kinadak-ang kaayohan para sa kinabag-an sa katawhan.
- Latest
