Pipila ka timaan

Mga timaan sa pag-asumir sa bag-ong mga opisyal sa udtong tutok gahapon, Hunyo 30:

Maayong timaan nga unang nisugat sa bag-ong mga pangulo sa Cebu ug Cebu Province ang mga grupo nga dunay dinalian nga mga kawsa (Carbon vendors ang nihangop nilang Mayor Nestor Archival ug Bise Mayor Tommy Osmeña sa tugkaran sa City Hall ug mga nagpuyo sa 93-1 lots ang nagtapok sa tugkaran sa Kapitolyo sa paglingkod ni Gobernador Pam Baricuatro);

Maayong timaan ang pasundayag sa kasuod nilang Archival ug Osmeña nga klarong nakasugakod sa pasiuna nilang away sa implikasyon sa pag-usab sa zoning ordinance ngadto sa Carbon Market (ug ang pasalig ni Osmeña nga ang ilang relasyon modasig sa lalis dili sa pagyango);

Maayong timaan ang pagduaw ni Archival sa Kapitolyo aron paghangop ni Baricuatro sa unang mga gutlo sa ilang pag-asumir sa puwesto (gawas sa 93-1, ang pagtinabangay sa siyudad ug probinsiya importante sa pagluwas sa Cebu Bus Rapid Transit project);

Dili maayong timaan nga apil sa labing unang gitaod sa mga bungbong sa Kapitolyo mao ang dagkong hulagway ni Baricuatro (usa lang ka adlaw human gidalidali og panghipos ang mas dagko ug mas daghan ug mas luod nga mga hulagway ni kanhi gobernador Gwen Garcia);

Maayong timaan ang pagtudlo ni Baricuatro ni kanhi Tourism secretary Ace Durano isip provincial administrator (ang kasinatian ni Durano sa gabinete ug sa lokal nga politika makatabang pagtakda og bag-ong direksiyon sa Kapitolyo human sa katuigan sa mga paukyab ni Garcia);

Maayong timaan nga nakigtagbo dayon si Bise Gobernador Glenn Soco ni Baricuatro atubangan sa kahadlok nga siyay gamiton ni Garcia paglawgaw sa bag-ong administrasyon;

Maayong timaan nga nagtapad sa flag raising ceremony sa tugkaran sa Mandaue City Hall ang outgoing ug incoming mayors nga silang Glenn Bercede ug Jonkie Ouano ug nag-abot dayon sa sesyon sa Mandaue City Council ang outgoing ug incoming councilors; ug

Dili maayong timaan (parang Garcia) nga si Sandiganbayan Presiding Justice Geraldine Faith Econg, nga iyang gipasanginlan nga usa sa mga responsable sa pagpahamtang sa Ombudsman og unom ka buwan nga preventive suspension nga wala niya tumana, maoy nipapanumpa sa lab-as nga termino ni Gobernador Aris Aumentado sa Bohol.