Makabalik pa ba?

Dili sakop sa karaan nga politikanhong mga dinastiya ang molingkod nga bag-ong mga pangulo sa Cebu City ug Cebu Province karong udtong tutok:

•             Si Mayor Nestor Archival dili hinuon maka-ikyas sa pasangil nga nagsugod og dinastiya kay nidagan ug nidaog sab ang iyang pag-umangkon nga si Konsehal Nice Archival sa amihanang distrito; ug

•             Si Gobernador Pam Baricuatro bisan kon kaatbang sa politika dili mohimakak nga iyang mga paryente ang magtiayong mayor ug bise mayor sa Pinamungajan nga silang Glenn Baricuatro ug Jecjec Baricuatro.

***

Nahikawan silang kanhi gobernador Gwen Garcia ug kanhi mayor Raymond Garcia sa talagsaong kahigayonan sa ilang dinastiya sa paglugway sa pagkontrolar sa duha ka labing gamhanang mga puwesto sa Sugbo. Kataposang mga sakop sa samang dinastiya nga nagkadungan sa pagpangulo sa Kapitolyo ug City Hall mao silang Mayor Tommy Osmeña ug Gobernador Lito Osmeña sa 1988-1992.

Kanus-a napakita ang talagsaon nilang liderato ug pagtinabangay sa pagpabangon sa Sugbo human naggusbat sa bagyong Ruping sa 1990. Sa pikas nga bahin, ang dungan nga liderato sa mga Garcia nakamugna og daghan uyamot nga mga eskandalo.

***

Nakadugang sa kalbaryo ni Gwen Garcia mao nga napilde atol sa kinakusgan niyang pagdominar sa politika sa Sugbo: Iyang mga alyado ang tanang mayor sa 44 ka lungsod ug unom sa pito ka mayor sa mga siyudad (Danao City ray nisukol niya).

Gawas sa gilubong sa wala pa sukad mapili og puwesto sa gobyerno, nakadugang sa kasakit nga nidaog ang 43 sa 44 niya ka mayor sa kalungsoran (si Ace Binghay sa Balamban ray napilde) ug unom sa pito ka mayor sa mga syudad (si Jonas Cortes sa Mandaue ray napukan) ug tanang kongresista (gideklarar niyang free zone ang ikaupat nga distrito diin nag-unay ang iyang mga alyado).

***

Wala pay napakita si Gwen Garcia nga ebidensiya sa tikas sa eleksiyon. Unang nabantang ang dagkong buslot sa disqualification case sa iyang kampo batok ni Baricuatro. Nagsugod na sang mga alyado pagbiya (apil nang mayor sa Medellin nga nanumpa atubangan ni Baricuatro ug taga unang distrito nga wala mo-imbitar niya sa oathtaking).

Maong nakaangkon og sukaranan ang pangutana: Makabalik pa ba si Gwen, o si bisan kinsang Garcia, sa Kapitolyo?