Mga itoy ni Gwen

Maklaro karong hapon kon magpadiktar ba gihapon ang mga sakop sa Cebu Provincial Board ni outgoing Governor Gwen Garcia. Sa pagpalusot atol sa ilang regular session sa kuwestiyonableng ?1.2 bilyones nga supplemental budget bisan pila na lang ka adlaw ang nahibilin sa iyang termino.

Hinaot nga ang kaisog sa pipila nila pag-boykot sa special session niadtong Miyerkules, labi nang pagkuwestiyon sa usa nila sa klarong maniobra pag-inutil sa administrasyon ni Governor-elect Pam Baricuatro, makaaghat sa mas daghan pa sa paghimo og mas klarong deklarasyon nga dili na sila magpagamit.

***

Ang gidalidali pag-imbento nga gastohan sa pagtukod og mga opisina sa bag-ong board members naapil na sa giaprobahang ?107 milyones nga budget sa Office of the Vice Governor sa tibuok tuig 2025.

Kahibulongan nang daan nganong ang supplemental budget mas dako kay sa orihinal nga budget. Mas dako pa gyong eskandalo nga ang ?1.2 bilyones adto ibubo sa opisyal nga, samtang gisugo sa Local Government Code sa pag-preside sa mga sesyon ug pagtudlo sa mga trabahante sa provincial board, walay gahom sa pagpatuman og higanteng mga proyekto.

***

Kon naglibog ang board members kinsay ilang palabihon --ang ila bang utang kabubut-on ni Garcia o ang ila bang mandato sa pagserbisyo sa mga Sugbuanon-- dili sila kinahanglan nga motan-aw og layo. Angay nilang sundon ang gihimo ni Board Member Jiembo Borgonia.

Si Borgonia usa sa labing suod ug usa siya sa labing aktibong nagpaluyo sa mga programa ni Garcia. Pero dihang nakumbinser siya nga gamiton silang kahimanan sa pagsabotahe sa sunod nga administrasyon, gipili niya ang kaligdong.

***

Nakadayeg kong Board Member Tata Corominas-Toribio sa iyang pagtingog sa kontrobersiya. Pero gihilasan ko sa iyang sulti nga dili angayng pasanginlan nga sipsip ni Garcia silang board members nga nitunga niadtong Miyerkules.

Aron makumbinser ang mga Sugbuanon sa pasalig ni Toribio sa iyang kamatinud-anon sa trabaho, mohangyo ko niya sa pagpakita sa minutes sa mga sesyon dihang ilang gidasonan ang quack science ni Garcia sa pagsupak sa protocols sa COVID-19 (nga gibasol nga maoy naka-paspas sa pagkatap sa Omicron sa Kabisay-an ug Mindanao) ug African Swine Fever (nga maoy nakapadaghan sa nangamatay nga mga baboy sa probinsiya).