Buylo nang vote-buying
Nagsugod nang pinalitay sa mga botante. Mas sayo kay sa nangaging mga eleksiyon. Mas dako sang kantidad kay sa naandan. Segun sa mga letrato ug video nga gipadala sa nagpakabana nga mga botante, P500 ang labing menos nga gitapot sa sample ballots.
Nagkalainlain ang mga paagi sa pagpanghatag. Dunay gihatod sa kabalayan. Duna say gipaadto sa mga balay sa mga lider sa mga purok aron makuha ang sobre human makapirma. Ang uban walay kaikog nga nigamit sa barangay gym sa bantang nga pinalitay, maong nagpunsisok ang mga molupyo nga nag-ilogay pagsusi naapil ba sila sa listahan.
-o0o-
Akong gipadala ang tanang ebidensiya sa pinalitay ngadto sa nasudnon ug lokal nga mga upisina sa Commission on Elections (Comelec). Nagduda hinuon ko nga mas una silang nakadawat sa mga reklamo, ug gihan-okan sa mas daghan pa gyong ebidensiya, sa mga botante nga nakatultol sa ilang social media accounts.
Atong susihon kon imbestigahon ba gyod ang tanang kaso. O, sama sa naandan, kutob ra sa pagarpar ang Committee on Kontra Bigay (CKB) sa Comelec nga patubagon ang tanang gipasanginlan og vote-buying.
-o0o-
Nakalili sab ko sa sample ballots nga gi-apud-apod sa mga mayor sa mga syudad ug mga lungsod sa Probinsiya sa Sugbo, nga pulos alyado ni suspended Gov. Gwen Garcia. Interesado tingali ang Malakanyang nga mahibawo nga, sukwahi sa pasalig ni Garcia, dili 100% ang suporta sa mga mayor sa senatorial candidates sa administrasyon.
Naapil sa sample ballots silang Imee Marcos ug Camille Villar bisan pa kon wala na hisguti sa mga diskurso ni Presidente Ferdinand Marcos Jr. human sila nagpa-endorse ni Bise Presidente Sara Duterte. Mas makapakugang pa gyod nga naapil silang Bong Go ug Bam Aquino.
-o0o-
Walo ra ka administration candidates ang naapil sa sample ballots nga akong nakit-an: Benhur Abalos, Abby Binay, Bong Revilla, Pia Cayetano, Lito Lapid, Manny Pacquiao, Francis Tolentino ug Erwin Tulfo.
Ambot nganong giisnab sa mga mayor silang Tito Sotto ug Ping Lacson, nga gipasaligan sa suporta ni Garcia atol sa ilang pagduaw sa Sugbo. Ug ambot maapas pa ba kay napatik nang sample ballots sa wala pa modeklarar og suporta si Garcia para ni Kiko Pangilinan niadtong Martes sa gabii.
- Latest
