Gwen nagduda sa Malakanyang?

Ambot unsay nakat-onan gikan sa iyang mga ginikanan, o natandog bang panghunahuna human sa daghang katuigan sa paghupot sa politikanhong gahom, abunda ang mga timaan nga dili ganahan si Gobernador Gwen Garcia nga motuman sa mga lagda nga mosukwahi sa personal niyang interes.

Gawas sa pagsupak sa mga sugo sa pagsuspenso niya niadtong Disyembre 2012 ug sa niaging buwan ug sa pagtaktak niya sa puwesto niadtong 2018, giisnab sab ni Garcia bisan ang batakang mga lagda sa siyensiya sa epektibong pagpanalipod sa kahimsog ug panginabuhi sa katawhan.

-o0o-

Gisupak niyang mga lagda sa Inter-Agency Task Force sa administrasyon ni kanhi presidente Rodrigo Duterte nga gitumong pagbadlong sa pagkatap sa kalibotanong hulga sa COVID-19. Kay niinsistir nga ang buot-buot niyang tuob maoy kinakusgang panagang.

Gawas nga gisupak ang protocols sa pagkontrolar sa African Swine Fever (ASF), gihulga pa g’yung ikiha ang mga opisyal sa Bureau of Animal Industry nga nag-dokumento sa mga kaso sa ASF. Sa walay pagkonsulta sa tinuod nga mga eksperto, gideklarar niya nga kolera, dili ASF, ang nakapatay sa mga baboy sa Sugbo.

-o0o-

Bisan napasabot na sa ombudsman nga nasubay ang due process sa pagpahamtang sa preventive suspension batok niya, nga epektibo nang suspenso kay wala siya kakuha og Temporary Restraining Order gikan sa Court of Appeals, nagdumili si Garcia sa pagkanaog sa Kapitolyo.

Nag-imbento hinuon og patakang lagda: Nga huwaton ang legal opinion sa Department of Interior and Local Government, nga walay labot sa mga lagda sa Commission on Elections parte sa mga suspenso atol sa election period

-o0o-

Dihang gitambagan sa nangaging mga higayon pagtuman sa mga lagda sa nasudnong gobyerno, si Garcia nipapirma sa mga og manifesto pagsuporta niya ug nipasidaan og “Don’t mess with us, Cebuanos.” Ning iyang pagka-suspenso, nipasangil og pamolitika kay dumadapig ni kanhi presidente Rodrigo Duterte ang nikiha ug tinudlo ni Duterte si Ombudsman Samuel Martires. Kon mao, iya ra untang karibal nga si Pam Baricuatro ang iyang tulisukon.

Nganong arogante na man sang nangangkon nga madiktahan niyang 3.4 milyones ka rehistradong mga botante sa Sugbo? Nagpasabot bang siya mismo nagduda nga may bendisyon sa administrasyon ang pagpalagpot niya sa puwesto?