Kinsay mga dumadaog
Sa hapit tanang surveys dayong eleksiyon sa Mayo 9, 2022, nag-una si Raffy Tulfo. Pero human sa opisyal nga ihap sa Commission on Elections (Comelec), natagak siya sa ikatulong luna. Naapsan siya sa numero uno nga si Robin Padilla ug sa ikaduha Loren Legarda.
Nitumaw sa adlaw sa eleksiyon ang dakong bentaha nilang Padilla ug Legarda batok ni Tulfo nga wala igkita sa surveys sa nagkalainlaing organisasyon: Gisuportahan sila sa administrasyon ni kanhi Presidente Rodrigo Duterte ug sa UniTeam ni Presidente Ferdinand Marcos Jr. Samtang si Tulfo nidagan nga independente.
***
Nga maoy gibasehan sa paneguro sa mga nagdumala sa kampanya sa Alyansa Para sa Bagong Pilipinas ni Marcos Jr. nga, kon molihok na ang makinarya sa administrasyon dayong eleksiyon, mosaka ang mga kandidato nga gisuportahan ni Marcos Jr. nga silang Erwin Tulfo, Tito Sotto, Pia Cayetano ug Bong Revilla.
***
Walay siyensiya nga makapasabot sa command votes sa administrasyon. Kay walay mga dokumento giunsa sa mga mayor, mga gobernador ug mga kongresista pagkontrolar ang mga botante ginamit ang kinakusgang sample ballots, nga maoy simbolo sa ilang vote buying.
Gibanabana nga ang maniobra makadugang og 5% ngadto sa 10% sa mga boto sa administrasyon. Makatabang sa mga nagkapyot sa Magic 12 (Camille Villar, Manny Pacquiao ug Lito Lapid) pero dili nang kaluwas sa mga nangiwit (Benhur Abalos ug Francis Tolentino).
***
Gipanid-an sa mga nagtuon sa surveys ang dakong sulbong sa suporta para sa mga kandidato ni Duterte. Sa nangaging mga kampanya, 5% ray kasagarang sulbong. Pero sa surveys sa Pulse Asia sa Enero ug Marso karong tuiga: Nisaka si Senador Bong Go og 11%; Phillip Salvador 12.5%; Rodante Marcoleta 12%; ug Jimmy Bondoc 16%.
Ang pagka-priso ni Duterte nakapukaw sa iyang politikanhong base. Mahimong ang ilang pagsulbong mao nay kinatas-an. Ug dili makausab sa mga dumadaog: 8 kang Marcos, 2 kang Duterte ug 2 ka independente.
- Latest
