Katungod nga masuko
Sakto si Bise Presidente Sara Duterte sa iyang pagpahinumdom sa taga Barangay Ermita sa Cebu City nga duna silay katungod nga masuko sa gobiyerno. Igong kasuko aron magpakabana ta sa pagpaningil og saktong serbisyo ug pagbaraw sa dili maayong binuhatan sa mga nagtungkawo sa puwesto.
Nga dili mao ang kasuko nga gusto sa mga Duterte: Sukad pa sa niaging tuig giawhag nilang people power pagpalagpot ni Presidente Ferdinand Marcos Jr.; gikumbinser ang militar ug kapolisan pagbakwi sa suporta sa commander in chief; ug gidasig ang taga Mindanao pagbuwag sa republika.
-o0o-
Hagbay ra natong gipahibawo ang administrasyong Marcos sa atong kasuko sa ilang:
• Pagmaniobra sa 2025 budget (gilaslasan ang gahin sa edukasyon ug kahimsog ug gipaburot ang pork barrel);
• Pagkuha sa P60 bilyones gikan sa Philippine Health Insurance Corporation (PhilHealth) bisan wala pa mabayri ang claims sa mga sakop ug mga ospital;
• Kainutil sa pagbadlong sa mga cartel nga nimaniobra sa suplay ug presyo sa bugas humay ug ubang mga produkto sa agrikultura; ug
• Pagsamot sa pangurakot sa tanang ahensya (nagsugod sa binilyon ka pesos nga kawat sa labing taas).
-o0o-
Hinaut nga dili manghulga ang bise presidente kon pahibaw-on sab sa atong kasuko sa mga binuhatan sa ilang dinastiya:
• Pagdumili niya pagpasabot giunsa paggasto ang confidential funds sa Office of the Vice President (OVP) ug Department of Education (DepEd) ug nganong gipapirma sa mga resibo silang Mary Grace Piattos ug laing 1,321 ka recipients nga dili tinuod nga mga tawo kay wala sa database sa Philippine Statistics Authority (PSA);
• Nahibaw-an sa House Quad Committee nga lapad nga binayranay sa laktod nga pinatyanay sa drug war ni kanhi Presidente Duterte nga wala kabadlong sa shabu pero nakabungkag sa karibal sa sindikato nga giingong gipangulohan nilang Michael Yang, Polong Duterte ug Mans Carpio;
-o0o-
• Pagbudhi nila sa nasud tungod sa padayong pagpakahilom sa mga panghasi sa China sa mga mangingisda ug mga sakop sa Philippine Coast Guard (PCG) ug pagdason sa ilang troll army sa propaganda nga ang Pilipinas maoy kontrabida kay China maoy tinuod nga tag-iya sa West Philippine Sea (WPS); ug
• Paugat nila pinaagi sa mga sulti ug buhat nga kublan sila sa balaod.
- Latest
