Lakwatsa sa mga senador

Tunga sa buwan nang nagbakasyon ang mga senador (nagdalidali og adjourn sa Pebrero 5 bisan ilang legislative calendar nagtakda sa sesyon hangtod sa Pebrero 7).

Bisan sa pag-apura sa mayoriya sa katawhan (73% uyon sa impeachment segun sa Tangere survey karong buwana), padayong giyak-an ang sugo sa 1987 Constitution: Paghimo dayon og impeachment trial kon madawat ang articles of impeachment nga gipirmahan sa labing menos ? sa mga sakop sa House.

* * *

Samtang padayon ang mga magbubuhis nga nagbayad sa dagko nilang suholan ug benepisyo. Kada usa dunay ?53 milyones sa allowances niadtong 2020, segun sa Commission on Audit (COA).

Kada usa nagsuweldo og ?278,434 kada buwan. O ?9,281 kada adlaw. Sukad sa ilang pagbakasyon, kada senador nakakobra og ?139,215 sa suweldo. Mas dakong allowances nga ma-liquidate sa certification lang nga nahurot nila og gasto.

* * *

Imbes magtagbo isip impeachment court, manumpa isip senator-judges ug maikog sa binilyon ka pesos nilang kapritso nga gigastohan sa mga magbubuhis (nga nag-antos sa gamayng kita ug sulbong sa presyo sa batakang palaliton), silang:

• Chiz Escudero: Nagsige og pa-interview nga ang “forthwith” sa konstitusyon nagkahulogan nga Hulyo pang husay;

• Jinggoy Estrada: Nag-promote sa iyang “Jingflix” ug BFF party-list nga iyang asawa ug anak ang nominees;

• Joel Villanueva: Nagpasingot sa Senate Sentinels basketball practice;

• Robin Padilla: Nag-reunion sa Pamilyang Cariño sa Angeles City;

* * *

• Sherwin Gatchalian: Nag-birthday party sa Taguig para ni Japanese Emperor Naruhito;

• Alan Peter Cayetano: Nagsige og Facebook Live;

• Cynthia Villar: Nangulo sa Tropang Villar Valentine’s Party sa Barangay Talon 5 sa Las Piñas;

• Mark Villar: Nitilaw sa sikwate sa ilang coffee shop sa Dipolog;

• Loren Legarda: Nagtuon og sayawng swing uban ni Alex Gonzaga;

• Grace Poe: Nangampanya sa FPJ Partylist nga iyang anak ang nominee;

• Raffy Tulfo: Nipakauwaw og asawang nangabit sa iyang online program;

• Nancy Binay: Nag-barangay raffle ug dance showdown sa Makati;

• Migz Zubiri: Nipahibawo nga lisensiyado nang agriculturist;

• JV Ejercito: Ni-greet og happy birthday ni Jinggoy sa Pebrero 17;

• Francis Tolentino, Imee Marcos, Bong Go, Bato dela Rosa, Lito Lapid, Pia Cayetano ug Bong Revilla: Nangampanya para reelection; ug

• Risa Hontiveros ug Koko Pimentel: Nag-apura nga mag-impeachment trial sa Marso.