Dugay nang andam
Agosto sa niaging tuig, nagdumili si Bise Presidente Sara Duterte sa pagtubag sa mga pangutana sa mga sakop sa House Appropriations Committee parte sa iyang gipangayong budget sa Office of the Vice President (OVP) para sa 2025 ug giunsa paggasto ang iyang pundo sa nangaging katuigan.
Iyang rason? Kay iyang nahibaw-an nga sa Nobyembre 2023 pa naumol ang plano sa mga kongresista sa pag-impeach niya. Ug nga ang tanan nilang mga pangutana pulos gitumong sa paghanig ug pagpalig-on sa mga pasangil sa articles of impeachment nga giandam na batok niya.
* * *
Septiyembre sa niaging tuig, nibalibad si Duterte sa pagpanumpa nga mosulti sa tinuod atol sa pormal nga pagsugod sa imbestigasyon sa House Committee on Good Government giunsa sa paggasto ang confidential ug regular funds sa OVP ug sa Department of Education (DepEd) ubos sa iyang pagdumala isip Education secretary sulod sa duha ka tuig.
Iyang rason? Kay gisugo lang ang mga kongresista sa paglit-ag niya aron makahimo og mga pamahayag nga ilang magamit isip dugang mga ebidensiya sa impeachment nga dugay nang giluto sa liderato sa House batok niya.
* * *
Wala siya ma-impeach sa 2024 pero:
• Iyang pagdumili pagpanalipod sa OVP budget niresulta sa higanteng laslas sa iyang gipangayo nga kapin sa ?2 bilyones ngadto na lang sa ?733 milyones; ug
• Iyang pag-isnab sa imbestigasyon wala kapugong sa paghipos sa mga ebidensiya sa paggasto og ?125 milyones sulod lang sa 11 ka adlaw niadtong Disyembre 2022 ug pagpapirma og acknowledgment receipts nilang Mary Grace Piattos, Kokoy Villamin, ug laing kapin sa 3,000 ka mga ngalan nga wala sa database sa Philippine Statistics Authority.
* * *
Human na-impeached sa House niadtong Pebrero 5, niinsistir nga mas sakit pang buwagan og uyab, nga wala mobasa sa mga pasangil kay gisalig ra sa mga abogado ug nga dihang gipahibawo sa impeachment igo rang gipadad-an sa iyang amahan og video sa kanhi presidente nga nikanta og “MacArthur Park.”
Dugay na g’yud tingaling nakapangandam sa impeachment ug nahinangop g’yud tingali nga makaangkon og kahigayonan nga makatubag sa mga pasangil batok niya. Kay iyang amahan ug ubang mga abogado nagdalidali man sa pag-petisyon sa Korte Suprema nga ipahunong ang impeachment proceedings.
- Latest
