Pagnihit sa kapilian

Gipasikad ang pahibawo ni Bise Presidente Sara Duterte nga tulo ka Duterte ang modagan sa Senado --si kanhi presidente Rodrigo Duterte, Davao City Mayor Baste Duterte, ug Kongresista Pulong Duterte-- sa pagtuo nga walay makapugong sa ilang pagdaog sa eleksiyon sa 2028:

•             Walay mohagit sa ilang liderato sa Davao City (maong ibilin og itoy ang City Hall);

•             Sakmiton nilang liderato sa Senado (o modaog og siyam ka lingkoranan aron pagbaraw sa impeachment ni Sara); ug

•             Mas takos silang mopalagpot ni Presidente Ferdinand Marcos Jr. gikan sa gahom (aron makabalik sila sa Malacañang).

***

Upat ka buwan human sa pahibawo niadtong Hunyo, nahugno ang panglantaw sa mga Duterte sa pagsumiter sa certificates of candidacy sa Oktubre:

•             Nakumbinser nga walay bisan usa nilang makadaog pagka senador ug kinahanglang motingob sa ilang puwersa pagpanalipod sa Davao City gikan sa hulga sa mga Nograles nga nilig-on tungod sa makalilisang nga ayuda (bag-ong termino sa vote buying) sa administrasyon; ug

•             Napugos pagbanhaw sa panghadlok sa drugas sa kabalakang mabawo og huwat sa milagro ni Apollo Quiboloy sa pagpadaog nilang Bato dela Rosa, Philip Salvador, ug uban nilang mga kandidato.

***

Inigbalik sa sesyon sa Kongreso karong adlawa, kutob rang taga Davao sa pagtan-aw sa mga sakop ni House Speaker Martin Romualdez nga mopalig-on sa mga ebidensiya batok sa mga Duterte:

•             Gipaabot nga mahigot nang kanhi presidente sa lapad nga binayranay sa laktod nga pinatyanay sa iyang drug war sa public hearing sa House Quad Committee; ug

•             Gikatakdang ipadakop sa House Committee on Good Government ang mga sinaligan sa bise presidente aron mas maapiki sa pagpataka og gasto sa iyang confidential funds.

***

Human sa pila ka semana nga pagtago sa tinuod nga tuyo sa ilang imbestigasyon ni Sara, hukman sa House karong semanaha unsay unang ibunal niya --impeachment o plunder.

Tungod sa argumento nga immune sa mga kaso ang bise presidente, gitun-an sa mga kongresista unsaon pagpadali ang impeachment nga maglakip sa silot pagdili niya sa pagdagan pagka presidente sa 2028. Kalikayan ni Sara ang perpetual disqualification pinaagi sa pag-resign kon maklarong makakuha og ? majority vote sa Senado pagpalagpot niya. Nga nagkahulogan nga mas laktod siyang mapasakaan sa dili kapiyansahan nga kasong plunder.