Tom O ug Quadcomm
Daghang nangutana kanus-a imbitaha pagbalik si kanhi Cebu City mayor Tommy Osmeña sa House Quad Committee nga nangimbestigar sa extrajudicial killings (EJKs) sa drug war ni kanhi presidente Rodrigo Duterte. Natapos nang Oktubre. Ug walay timaan nga apil si Osmeña sa pagpadayon sa imbestigasyon sunod semana.
Ganahan kong motuo nga wala tuyoa sa quadcomm nga makahipos sila og daghang mas mapuslanon ug mas dinaliang kasayuran. Maong naapsan ang mga testimoniya ug mahimong wala nay panahon para nilang Osmeña, kanhi Iloilo City mayor Jed Mabilog, ug uban pang nangaging resource persons.
* * *
Pero mga politiko ang hawod sa quadcomm. Ug mahimong dili hustisya para sa mga biktima sa EJKs ang kinadak-an nilang tuyo. Kon dili ang pagguba sa kanhi presidente. Aron nga dili na makahulga si Bise Presidente Sara Duterte sa ambisyon ni House Speaker Martin Romualdez sa 2028.
Posibleng wala na isipa ang EJKs sa Sugbo sa 2018 ug 2019, nga gipasangil batok nilang Koronel Royina Garma ug Heneral Debold Sinas, nga importante pagduot sa mga Duterte. Igo na lang tang manghinaot nga maka-benepisyo sang mga biktima sa ilang pamolitika.
* * *
Nausab bang hunahuna sa quadcomm human gisultihan si Romualdez nga ang pagtugot sa dugang testimoniya ni Osmeña, nga makit-an sa minilyon nga nagsunod sa imbestigasyon, dili makatabang sa ilang mga alyado sa Sugbo sa eleksiyon sa Mayo 2025?
Nakumbinser ba sa kahadlok sa ilang lokal nga mga lider nga ang pagpaatubang ni Osmeña sa quadcomm makapahinumdom lang sa mga Sugbuanon sa mas maayong liderato nga gihikaw gikan sa Sugbo tungod sa terorismo nilang Duterte, Garma, ug Sinas?
* * *
Mas bug-at ang paniid sa usa ka viewer sa among programang “Baruganan” sa YouTube: Unang gi-imbitar sa quadcomm si Osmeña aron pagguba ni Garma, nga gituohang usa sa labing suod ni Duterte. Karong nibalitok na si Garma, nakapirma na man gani og duha ka affidavits batok ni Duterte, wala na kinahanglana si Osmeña.
May sukaranan bang pagduda: Nga gawas nga wala sila magpaabot og mas lig-ong ebidensiya gikan ni Osmeña nga mas makaduot sa mga Duterte, mahimong dili ganahan ang mga kongresista nga maminaw og resource person nga imbes modason mopasidaan nila nga dili kasaligan si Garma.
- Latest
