USC, DBTC gisubha'g kadaogan sa CESAFI football
CEBU, Philippines — Ang mga defending champion nga University of San Carlos (USC) Golden Booters ug Don Bosco Technical College (DBTC) Greywolves misikad sa ilang kampanya pinaagi sa usa ka masipang buto sa Cebu Schools Athletic Foundation, Inc. (CESAFI) Season 24 football tournament niadtong Dominggo, Oktubre 6, didto sa Cebu City Sports Center.
Sa college division, gisugdan sa USC ang pagpanalipod sa ilang trono pinaagi sa 2-0 nga pagpakaging sa University of the Philippines (UP) Cebu Fighting Maroons.
Sila si John Cyril Sinoy ug Nino Gianpaolo Pastrana maoy mituboy sa Carolinians ngadto sa inisyal nga kalamposan human sila milansang og goal sa ika-28 ug ika-85 nga minuto.
Sa laing collegiate nga sangka, ang University of Southern Philippines Foundation (USPF) Kicking Panthers mipukan sa University of San Jose-Recoletos (USJ-R) Kicking Jaguars, 1-0. Si John Rey Arino ang mitunol sa nakapadaog nga goal sa Kicking Panthers sa ika-38 nga minuto.
Sa aksiyon sa high school, giablihan sa Don Bosco Greywolves ang ilang depensa pinaagi sa 2-0 nga pagpayaka sa USC-Basic Education Department (BED).
Si Czar Robert Daanoy ang unang naka-goal sa Bosconians sa ika-30 nga minuto ug gisundan kini ni Mark Anthony Talingting sa ika-44 nga minuto.
Sa laing resulta, ang Sacred Heart School-Ateneo de Cebu (SHS-AdC) Magis Eagles mipaluhod sa USJ-R, 2-0, luyo sa sunod-sunod nga goals nilang Kian Juaquine Pimentel ug Zidane Cañete sa ika-21 ug ika-25 nga minuto.
- Latest
