Sakto si Torre

Nihit ang detalye diin nisurender si Apollo Quiboloy. Maong wala mapahilom ang mga bugalbugal nga imbento ra ni Davao Region Police Chief Nicolas Torre III ang mga pitik sa kasingkasing nga nabatyagan sa ilang ekipo sulod sa compound ni Quiboloy bisan sa:

•Taho ni Kalihim Benhur Abalos sa Department of Interior and Local Government (DILG) nga nakit-an si Quiboloy sa lugar nga gitumbok ni Torre nga nahimutangan sa iyang bunker; ug

•Pahibawo ni Presidente Ferdinand Marcos Jr. nga napugos pagsurender si Quiboloy kay nagkaduol nang kapolisan sa iyang gitagoan.

***

Nakapasamot sa kalibog ang sulti sa mga abogado ni Quiboloy nga sa bukid sa Davao siya nisurender kay walay bunker sa compound. Walay pay nibakwi sa mga pangangkon nga wala si Quiboloy sa compound:

•Niinsistir si Atty. Israelito Torreon nga nibiya si Quiboloy niadtong Marso;

•Niawhag si Senador Bato dela Rosa sa kapolisan pagpahawa sa compound kay wala nay rason pagpabilin human sa kapin sa duha ka semanang operasyon; ug

•Nideklarar si Bise Presidente Sara Duterte Carpio nga hagbay rang nakagawas si Quiboloy ug mahimong tua na sa langit.

***

Bisan dili gawasnon sa pagbisto sa iyang nahibaw-an, may kasayuran nga gitug-an si Torre sa media nga magtumbok nga sa compound nadakpan si Quiboloy:

•Gisugo siya sa dili pagbabag sa convoy sa mga sakyanan nga nibiya sa hangar sa mga ayroplano ug helikopter ni Quiboloy sa sayong gabii niadtong Domingo; ug

•Gipasakay si Quiboloy sa C-130 plane nga bag-o lang nitugpa sa Tactical Operations Group (TOG)-Davao sa karaang airport sa Sasa nga duol ra sa compound.

***

Pila ka oras human sa pagsurender nilusad og desperadong kampanya ang trolls sa kampong Duterte-Quiboloy sa pagpahiyos sa papel sa kapolisan pinaagi sa pag-insistir nga nisurender si Quiboloy sa Intelligence Service of the Armed Forces of the Philippines (ISAFP) ug nga adto siya tanggungon sa AFP national headquarters sa Kampo Aguinaldo.

Pero gisukwahi sila sa press statement ni Torreon. Kinsa nilista sa mga opisyal sa PNP ug AFP nga iyang gipasalamatan nga nakatabang sa sabutsabot. Ug sa aktuwal nga pagkatanggong nilang Quiboloy ug kaubang mga sinumbong sa custodial center sa Kampo Crame, ang national headquarters sa PNP.