Mga bulilyaso ni Sara

Haskang daghanang bulilyaso sa Department of Education (DepEd) ubos sa pagdumala ni kanhi Education Secretary Sara Duterte Carpio sa 2023 nga nasakpan sa Commission on Audit (COA):

• Wala katuman sa target sa pagtukod og bag-ong classrooms (3% ray nahimo), pag-ayo sa gubaon nga classrooms (2% ray natiwas) ug bisan sa paghatod sa mga lingkoranan sa mga tinun-an (nalangay og unom ka buwan); ug

• Wala magkadimao ang P5.69 bilyones nga feeding program kay nalangay o wala moabot ang mga pagkaon ug ang nangabot pan-os, gi-agup-op, lata na o hilaw pa.

* * *

Bugtong paspas niyang napatuman mao ang paggasto sa iyang P112.5 milyones nga confidential funds sa 2023. Samtang may siyam ka buwan o 270 ka adlaw nga lugway, naggasto niya ang kantidad sulod lang sa 190 ka adlaw, o 143% nga efficiency.

Ang problema mao nga wala mahibawo ang mga opisyal sa DepEd unsay iyang gigastohan. Ang ilang nadawat mao ra ang cover letter sa iyang liquidation. Kay dili man motubag og bisan unsang pangutana, giawhag ang Appropriations Committee sa House of Representatives sa pag-subpoena sa iyang mga dokumento.

* * *

Nipagawas og press statement si Carpio nga nihimakak nga nagpataka siya og gasto sa confidential funds. Pero imbes mo-detalye pagtubag, gi-atake niya ang mga namasangil:

• Gisumbalik nga walay hunong ang pamolitika sa Makabayan-Marcos-Romualdez alliance aron pagtabon sa kakabos ug kagutom sa katawhan tungod sa walay hunong nga pagsulbong sa presyo sa mga pagkaon; ug

• Giawhag ang iyang mga kaatbang sa pagtrabaho una sa dili pa mamolitika.

* * *

Kon gituman pang Carpio ang iyang kaugalingong tambag sa pag-una sa trabaho kay sa pamolitika, taas unta nga lista sa accomplishments ug dili kasaypanan ang makit-an sa COA ug mas sayon untang matubag ang pasangil batok niya.

Kay wala may ikapasigarbo sa DepEd ug labaw pa man nga walay klaro ang kapuslanan sa mga nahimo sa Office of the Vice President (OVP), panginsulto na lang ang ikatubag ni Carpio ug sa iyang trolls: Konbiktado sa child abuse si Kongresista France Castro sa ACT; komunista si Kongresista Raoul Manuel sa Kabataan; abuso sa balaod ang pagpangita ni Apollo Quiboloy; ug masakiton si Presidente Ferdinand Marcos Jr.