Pagpangayo og pasaylo
Hangtod sa akong pagsuwat ini, usa ka adlaw human sa closing ceremony sa Palarong Pambansa 2024, way bisan usa sa mga opisyal sa Cebu City Hall ug sa Department of Education (DepEd) ang nangayo og pasaylo sa usa sa labing makauuwaw nga eskandalo sa 76 ka tuig nga kasaysayan sa mga duwa:
Sukwahi sa pasalig sa hingpit nga kaandam, kuwang ang sukod sa rubberized track oval sa Cebu City Sports Center nga gipahigayonan sa athletics events, nga nakapahagsa sa tam-is nga kadaogan sa mga tinun-ang atleta nga naka-buak sa records sa mga lumba nga 200 metros ug mas taas pa.
* * *
Way molalis sa pangangkon sa kalamposan sa mga tigpasiugda. Kay hapsay ug luwas nga napahigayon ang gatosan ka duwa bisan sa daghang kakulian, apil nang hulga sa uwan ug baha sa nagkalainlaing venues sa tibuok semana.
Pero angay sab nilang angkunon ang responsibilidad sa dakong inhustiya batok sa mga bata ug sa mga eskuylahan, rehiyon ug katawhan nga ilang girepresentahan. Nga nanukad sa ilang pagpabaya. O sa kapakyas sa paghimo sa tanang paningkamot aron motakdo sa ilang paukyab nga tinuod na gyong andam ang tanang aspeto sa Palaro.
* * *
Mangahas ko og sugyot nga mangaon og humble ug mangayo og pasaylo silang suspended Mayor Mike Rama, acting Mayor Raymond Garcia, acting Vice Mayor Dondon Hontiveros, Sports Commission Chair John Pages ug nasudnon ug lokal nga mga opisyal sa DepEd.
Kon mahimo, pagmatuod nga kinasingkasing ang pagpaubos, tagsa-tagsaon nila og duaw ang mga pinuy-anan sa 19 ka mga atleta sa lima ka rehiyon nga nakahimo og records sa 3000m steeplechase, 2000m walk, 400m hurdles, ug 4x400m relay.
* * *
Nahinaykan na man, mosugyot sab ko mangayo sila og pasaylo sa Sugboanong mga magbubuhis. Nga ilang gipagasto og P262 milyones, apil na ang P53 milyones para sa renovation sa rubberized track oval, aron lang maduhig sa kauwawan.
Ambot unsay ilang mahimo pagpapas, o bisan pag-iban na lang sa buling sa kadungganan sa Cebu City, kansang suspended mayor wa kahibawo nga kinahanglan diayng sukdon ang track oval ug acting mayor nga niinsistir nga isibog lang ang starting line, sa gipasigarbong world class track oval nga kuwang diay ang sukod.
- Latest
![](https://qa.philstar.com/images/stand-in-photo-male.jpg)
![](https://qa.philstar.com/images/stand-in-photo-male.jpg)