Alas ni Yang

Kon mobalik sa Pilipinas gikan sa Dubai ug makit-an ni retired police major general Napoleon Taas ug sa iyang mga sakop sa Office of the Sergeant-at-Arms sa House of Representatives, si Michael Yang, adviser ni kanhi Presidente Rodrigo Duterte, posasan ug prisuhon siya sa Bicutan sa Taguig City.

Sukitsukiton siya sa mga kongresista sa posibleng koneksiyon sa ?3 bilyones nga shabu nga nasakmit sa Mexico, Pampanga, sa niaging tuig. Interesado sang mangutana si Senador Risa Hontiveros sa posibleng koneksiyon niya sa operasyon sa illegal POGO hubs nilang Mayor Alice Guo.

* * *

Ang kasayuran nga nahipos sa House ug sa Senado mao lay kinauwahian sa nagkataas nga lista sa mga krimen nga gipasangil batok ni Yang:

• Kanhi polis nga si Eduardo Acierto nipasangil niya nga drug lord samtang laing kanhi polis nga si Arturo Lascañas niingon nga siya ang nagdala og chemist gikan sa China nga maoy nagduma sa tulo ka shabu laboratories ni Duterte sa Davao; ug

• Kanhi Senador Dick Gordon kumbinsido nga siya ug si Duterte ang utok sa binilyon ka pesos nga Pharmally scandal atol sa pandemya sa COVID-19.

* * *

Si Yang di ordinaryong alalay ni Duterte. Dayong pahibawo sa iyang kandidatura pagka presidente niadtong Nobyembre 2015, sa giisip nga kabahin sa iyang paneguro nga makalahutay sa nasudnong kampanya, nibiyahe si Duterte sa Xiamen sa China ug naletratohan nga gilibot ni Yang sa headquarters sa iyang Full Win Group of Companies.

Si Yang sab ang usa sa nigiya sa iyang unang state visit sa China niadtong 2016. Si Duterte gikataho nga gipasaligan ni Yang sa iyang personal nga koneksiyon sa labing dagkong mga opisyal sa China.

* * *

Si Duterte, sa usa sa mga diskurso niya sa Malacañang niadtong 2018 kanus-a wa pay makapugong sa iyang baba, nitubag sa mga kahibulong nganong sikit silang Yang pinaagi sa pagbisto unsa kasuod si Yang sa gobyerno sa China sa nangaging katuigan:

• Ang Chinese ambassador to the Philippines nga si Huang Xilian adto matulog sa balay ni Yang; ug

• Si Yang kabahin sa entourage ni anhing Chinese prime minister Li Keqiang, nga mao untay gipaabot nga sunod nga pangulo sa China pero naapsan ni Presidente Xi Jinping.