Panghimakak ug paghilom

Silang Kongresista Lolypop Ouano Dizon sa Mandaue City ug kanhi presidential spokesman Harry Roque pulos dunay gipanghimakak nga mga pasangil karong semanaha. Managsama nga nikagar ang ilang panghimakak. Kay pulos sila nilapas sa batakang lagda sa pagtubag og pasangil: Panghimakak kutob sa imong mahimo ug hilom.

Silang Dizon ug Roque wa mohunong og sulti human gisalikway ang mga pasangil batok nila. Nagpadayon sila og sulti. Nga imbes makatabang nakapahuyang sa ilang kawsa. Maong nigamay ang kahigayonan nga tuohan ang ilang panghimakak. Ug mahimong mas daghang makumbinser sa mga pasangil batok nila.

* * *

Gawas nga nihimakak nga siyay nagpabalhin sa Mandaue City treasurer, ni-boluntaryo si Dizon sa kasayuran nga wa siyay suwat nga nihangyo nga papahawaon si Regal Oliva. Nga nihatag hinuon og ideya sa mga nakabati nga mahimong hunghong ra sa ilang paryente nga si Kongresista Yedda Romualdez ang nakaaghat sa bana nga si House Speaker Martin Romualdez pagsuwat sa Department of Finance.

Gipalasaw pa g'yung Dizon ang iyang panghimakak dihang niinsistir nga mahimo si Oliva nga ibalhin bisan asa ug busa angay nga motuman sa sugo sa iyang mga labaw.

* * *

Mas lawom ang gahong nga gikubkob ni Roque sa iyang kaugalingon: Daghan siyang istorya nga nakalimtan na unsay gipanghimakak. Gilista siyang abogado sa Lucky South 99, ang ilegal nga Philippine Offshore Gaming Operator (POGO) nga gironda sa Porac, Pampanga, sa mga dokumento nga gisumiter ngadto sa Philippine Amusement and Gaming Corp. (PAGCOR) kabahin sa ilang aplikasyon sa lisensiya.

Giklaro ni Roque nga di siyay abogado sa Lucky South 99 ug way labot sa paglista sa iyang ngan isip abogado sa ilang dokumento.

* * *

Kon nihunong pa lang unta og tabi, daghang di una mohukom samtang magpaabot duna bay ebidensiya batok niya. Pero nipuno nga ang kompaniya nabiktima sa estafa ug nangumbinser sa iyang kliyente pagbubo og puhonan sa iyang energy projects.

Nga napakyas pagtabon saiyang pagbisita niadtong Hulyo 2023 ug pagpanawag ka-unom sa PAGCOR hangtod sa Mayo karong tuiga aron pagsusi sa aplikasyon sa Lucky South 99. Ambot sa unsang kapasidad. Kay di man kaha siya ilang abogado. May mas lawom bang rason sa kaniadto pagdupa ug karon pag-distansiya na gikan sa ilegal nga POGO?