Pag-boykot sa Palaro
Dihang nipahibawo si Bise Presidente Sara Duterte Carpio niadtong Hunyo 29 nga motambong siya sa opening ceremony sa Palarong Pambansa sa Cebu City, naka-resign na siya sa gabinete ni Presidente Ferdinand Marcos Jr.
Bisan kon ang pag-epekto sa iyang resignasyon isip education secretary gitakda unya pa sa Hulyo 19, nahibawo si Carpio nga dunay kahigayonan nga makatudlo na si Marcos og bag-ong pangulo sa Department of Education (DepEd). Pero naneguro gihapon nga tambongan niya ang tanang kalihokan sa DepEd dinhi sa Sugbo, apil nang pag-abli sa Palaro, niadtong Hulyo 9.
* * *
Tuod man, gitudlo na ni Marcos si Senador Sonny Angara puli ni Carpio. Bisan kon naikog si Angara nga nipahibawo nga unya na manumpa sa bag-ong katungdanan sa Hulyo 19, bisan wa pa mopirma og opisyal nga mga dokumento, siya nay giila nga tagduma sa DepEd.
Si Carpio wa na manginlabot sa opisyal nga mga trabaho sa DepEd. Di na siya maoy nipirma sa DepEd memorandum nga nagtakda sa enrolment sa school year 2024-2025 sugod sa Hulyo 3 hangtod sa Hulyo 26 kon dili si Undersecretary Nolasco Mempin na.
* * *
Tungod sa iyang kumpirmasyon nga motambong sa Palaro opening, wa pakita si incoming Secretary Angara ug wa motudlo ang DepEd og representante nga mohimo sa opisyal niyang tahas sa opening ceremony–ang pormal nga pagpaila sa presidente.
Nipakita siya sa tanang kalihokan sa DepEd sa Sugbo sukad sa niaging weekend, niduaw pa gani sa Cebu City Medical Center ug Basilica Minore del Sto. Niño, pero wa mopahibawo sa mga tigpasiugda nganong wa motunga sa Cebu City Sports Center.
* * *
Samtang ni-boykot sa Palaro opening, nabisto sa social media nga si Carpio uban sa iyang manghod nga si Davao City Mayor Sebastian Duterte nakigkita ni suspended Cebu City Mayor Mike Rama. Ambot nausab ba lang ang iyang hunahuna sa kataposang gutlo. O naglibog pa kon:
Barugan ba ang pangangkon nga suod gihapon sila ni Marcos Jr. ug nga di pa siya andam nga mo-alkontra sa administrasyon; o
Mowakli na sa tanang pagpaka aron ingnon ug moduyog na sa iyang amahan ug mga igsuon sa pagbalikas ug pag-insulto sa presidente, sa iyang asawa ug kinakusgan nga ig-agaw.
- Latest
