Paglikoy sa WPS

Ambot kon unsay tuyo sa Malacañang sa pagpagamay sa labing uwahi nga engkuwentro sa mga sakop sa Philippine Navy ug sa China Coast Guard sa Ayungin Shoal niadtong Lunes sa buntag. Tingali aron pagpakalma sa tensiyon aron kalikayan ang pag-ulbo sa gubat sa West Philippine Sea.

O tingali aron pagkumbinser sa China nga bisan sa kabangis sa ilang gihimo --pag-ilog, pagguyod, ug pagbuslot sa duha ka rubber boats, pagsamad sa pito ka sundawo, ug pagkawat sa ilang high-powered nga mga armas ug mobile phones-- wa pa gihapon motahan ang Pilipinas sa diplomasya.

***

Mahimong mapakalma sa Malacañang ang tensiyon sa WPS sa way pag-insulto sa atong kasundalohan nga ang ilang pagkasamad, pagkabuslot sa rubber boats ug pagkawat sa ilang mga riple ug mobile phones nanukad lang sa kakuwang sa komunikasyon ug pagsinabtanay.

Mahimong ipadayon sa Malacañang ang paghatag sa tanang kahigayonan sa diplomasya bisan sa kabastos ug kabakakon sa China sa way pagpahiyos nga ordinaryo rang insidente ang seryusong hulga nga gisagubang sa atong kasundalohan ug ang talagsaon nga kaisog sa pagpanalipod sa ilang kaugalingon sa way pagpabuto sa ilang mga armas.

***

Ang pagbakwi sa Malacañang sa suporta sa mga operasyon sa WPS nahimo human gipasa ni Presidente Ferdinand Marcos Jr. ang krisis ngadto sa National Maritime Council. Ang kalihokan sa WPS kinahanglang tukion sa 12 ka ahensiya:

Department of National Defense, National Security Council, Department of Agriculture, Department of Energy, Department of Environment and Natural Resources, Department of Foreign Affairs, Department of Finance, Department of Interior and Local Government, Department of Justice, Department of Transportation, Office of the Solicitor General, ug National Intelligence Coordinating Agency.

***

Una nilang rekomendasyon nga giaprobahan sa presidente: Ang umaabot nga resupply missions sa Ayungin nagkinahanglan sa pagtugot sa presidente ug ipahibawo sa publiko sa di pa ipatuman. Ambot unsay ilang gipaabot nga mahitabo: Hipuson sa China ang ilang mga sundang ug mga atsa? O mag-andam sila og mas linuog nga mga alkontra?

Di ta mahibung sa kataphaw sa pagduma sa WPS kon pahinumdoman nga mao ni ang samang liderato nga nipasalig nga masulbad ang tanang problema sa nasud pinaagi sa panaghiusa ug pag-usab sa nasudnong slogan uban ang bag-ong awit ug panumpa.