Lipatlipat nga lusot

Naabtan og dul-an duha ka semana human nag-viral sa social media ang mga letrato sa gipatag nga kabukiran sa Cambuhawe, Balamban una nakaluwat ang Kapitolyo og detalyadong pagpasabot:

• Ang nagpadayong trabaho para sa road project sa Department of Public Works and Highways (DPWH) nga gigastohan sa nasudnong gobiyerno (pasumbingay nga mahimong gub-on ang bukid kay di man proyekto sa probinsiya); ug

• Wa pa mapalit ang luna nga tukoran sa bag-ong Kapitolyo (sukwahi sa pahibawo sa Kapitolyo sa niaging tuig nga 73% nang nahuman ang site development sa Capitol building sa Cambuhawe).

* * *

Laing lusot sa Kapitolyo: Ang gikagisan nga mga bukid pulos titulado sa pribadong tag-iya ug wa mahimutang sud sa protected area. Wa nila hisguti kon natuman ba ang mga lagda. Kay sa di pa mahilabtan ang bisan unsang bukid, sama nga sa di pa maputol ang mga punoan sa kahoy sa pribadong mga luna, kinahanglan nga mananghid sa Department of Environment and Natural Resources.

Wa nila tubaga ang mga pangutana sa nagpakabana nga environmentalists sa Sugbo: May nahimo bang environmental impact assessment ug may naluwatan bang environmental compliance certificate?

* * *

Sukwahi sa pasangil sa Kapitolyo, wa magtago sa ilang ngan ang mga sakop sa Save Cebu Movement. Nipirma sa pamahayag nga nagkuwestiyon sa pagpanamastamas sa bukid sa Cambuhawe para sa ilang mga organisasyon ang mosunod:

Anthony Galon, Atty. Rose-Liza Eisma-Osorio, Atty. Rhea Yray-Frossard, Atty. Amy Faith Suson-Sitoy, Atty. Amando Virgil Ligutan, Atty. Nhiel Anthony Serentas, Bro. Peter Simon Francis Jardinico, Catherine Ruiz, Cherry ug Orly Ballescas, Christine Collamar, Edgar Gahisan, Alvin Dizon, Fr. Vic Labao, Lorenza Fernandez, Marion Ocleasa, Rico Nunez, Teresa D. Ruelas, ug Bonnie Nalugon Javier.

* * *

Mahimong nagsugod na ang lipatlipat nga depensa sa Kapitolyo: Kahinumdom mo sa pagpalit nila niadtong 2008 sa Balili property sa Naga City? Aron pagpahilom sa mga pagsaway nga kabahin sa luna nahimutang ilawom sa dagat, dalidali nilang gi-abunohan og yuta.

Atubangan sa kabalaka sa environmentalists karong 2024 nga maguba ang kinaiyahan, nipasalig sila nga way bukid nga gub-on para sa bag-ong Kapitolyo. Unsay makapugong nila sa paglingkawas nga, sama sa nawagtang nga dagat sa Balili property, wa na say bukid sa Cambuhawe kay gipatag na sa DPWH?