Kaguliyang sa Cebu BRT
Nagpakauwaw lang ang lokal nga mga opisyal nga nanglawgaw sa pagpatuman sa Cebu Bus Rapid Transit (CBRT) Project kay:
• 2014 pang naaprobahan sa National Economic and Development Authority (NEDA) Board ang proyekto, ambot asang langoba sila nagluklok sa niaging dekada nga karon pa man nakahunahuna sa pagwara-wara pagsupak ini; ug
• Wa silay kalainan nilang kanhi Presidential Assistant Michael Dino ug kanhi Transportation Secretary Arthur Tugade nga nikumbinser ni kanhi Presidente Rodrigo Duterte sa pag-diskarel sa CBRT kay gipamugos ang way klaro nila nga alternatibo, ang Integrated Intermodal Transport System (IITS).
* * *
Kapasanginlan ang lokal nga mga politiko nga naglalis sa CBRT nga wa kasabot sa ilang gipanulti kon tinuod ang:
• Pahibawo sa Department of Transportation (DOTr) nga sila ang magbuot sa pagpatuman sa CBRT (kay nasudnong gobyerno mao ang nangutang og P17 bilyones gikan sa World Bank ug French Development Agency para sa proyekto), dili ang nagpataka lang nga mga opisyal sa Cebu City ug Cebu Province; ug
• Pagbisto ni kanhi Cebu City Mayor Tommy Osmeña nga donasyon sa iyang amahan ang bahin sa Osmeña Boulevard nga maagian sa CBRT.
* * *
Nipasalig silang Dino, Tugade ug Duterte nga magsugod na sa 2021 ang mga pasahero sa Cebu City ug sa probinsiya sa mas lapad nga IITS–nga maglakip sa CBRT, monorail transit (MRT) ug cable system.
Niabot ug nilabay ang 2021, napupos na lang ang ilang mga termino sa udtong tutok sa Hunyo 30, 2022, sama sa ubang mga proyekto nga gipasagarpar sa niaging administrasyon, way natukod nga bisan usa na lang ka haligi sa IITS.
* * *
Gisabotahe nilang Dino ug kaubanan ang CBRT kay nahibawo sila nga ang kinadak-an nga kredito maangkon ni kanhi Mayor Osmeña. Kinsa maoy nagtuon sa BRT sa Curitiba sa Brazil ug sa Bogota sa Colombia ug nagdasig sa administrasyon ni anhing Presidente Noynoy Aquino pagpatuman sa proyekto.
Nagyagaw ang CBRT karong gipatuman na sa bag-ong administrasyon tungod sa haw-ang sa lokal nga liderato: Si Mayor Mike Rama mas nitutok sa slogans kay sa direksiyon sa syudad; maong nikiat ang ambisyuso niyang mga konsehal; ug nanghilabot ang taga kapitolyo, nga mas ganahan og paukyab kay sa pagserbisyo sa mga Sugbuanon.
- Latest
