Insecure nga liderato
Human nipasangil ni kanhi Presidente Gloria Macapagal Arroyo nga nagplano sa pagpalagpot niya sa puwesto niadtong Mayo sa niaging tuig, si House Speaker Martin Romualdez nihimo dayon sa mga lakang nga gituohang nakapalig-on sa iyang liderato:
• Iyang gi-demote si Arroyo gikan sa pagka senior deputy speaker ngadto na lang sa pagka deputy speaker; ug
• Gitigom niya ang mga lider sa tanang politikanhong partido sa House, apil na ang partido ni Arroyo (nga iya na karong gipangulohan), ug sunud-sunod dayon nga nipagawas sa ilang pormal nga deklarasyon sa hingpit nga pagsuporta niya.
* * *
Dihang gi-atake ni kanhi presidente Rodrigo Duterte niadtong Oktubre sa niaging tuig nga nigamit sa pork barrel aron pagbusog sa tanang kongresista, si Romualdez wa mag-usik og panahon sa pagdangop sa gituohan nga kinakusgan niyang depensa:
• Gipapirma og manifesto pagsuporta niya ang mga kongresista sa tibuok nasud (apil na ang tanang kongresista sa Sugbo, apil na ang labing suod unta nga mga alyado sa mga Duterte); ug
• Gi-demote na sab si Arroyo gikan sa pagka deputy speaker ngadto sa pagka ordinaryo na lang nga kongresista dihang nagdumili sa pagpirma.
* * *
Dihang gipasanginlan sa iyang ig-agaw nga si Senador Imee Marcos nga nibundak og ?20 milyones kada distrito aron pagpamalit og mga pirma para sa people’s initiative sa pag-usab sa 1987 Constitution ug gi-imbestigar sa Senado ang mga pasangil nga gigamit ang minilyon ka pesos nga ayuda sa gobyerno pagpangilad sa mga namirma, mas paspas si Romualdez nga nigamit sa iyang paboritong panagang:
Gipasar sa labing menos 250 ka kongresista ang resolusyon nga nanalipod sa House ug, nakatag-an ka, nidelarar og hingpit nga suporta sa liderato si Romualdez.
* * *
Mahimong napamatud-an ni Romualdez ang hingpit niya nga pagkontrolar sa mayoriya sa mga kongresista, ambot tungod ba sa iyang liderato o sa gipasangil nga pagpabaha og minilyon ka pesos matag higayon nga dunay importanteng botasyon.
Pero napamatud-an sab ni Romualdez ang iyang ka-insecure. Dayon og palaban sa mga kongresista matag higayon nga dunay mangahas sa pagpanghilabot niya. Sa di pa magtuo nga ngilngig ang iyang liderato, hinaot dunay makapahinumdom nga ang bugtong rason nga naa pa siya sa puwesto mao ang iyang kasikit sa Malacañang ug pagkontrolar sa puntil.
- Latest
