Pulos dili interesado
Di si Bise Presidente Sara Duterte Carpio ang unang nihimakak sa iyang politikanhong ambisyon. Iyang kaugalingong amahan, si kanhi Presidente Rodrigo Duterte, nagbalikbalik dinhi sa Sugbo dayong 2016 aron pag-insistir nga di siya modagan sa pagka presidente. Kay igo lang nangampanya para sa federalismo.
Nahibawo ta unsay nahitabo. Nakalimtan ang federalismo. Gipaabot ang kataposang gutlo pagpahibawo sa iyang pagdagan. Ug gipilde ang mga nag-una og deklarar nga silang Mar Roxas, Grace Poe, ug Jojo Binay. Di mabasol ang anak, bisan nagkasukwahi kunohay sila, nga mosuway pagsunod sa agi sa amahan.
* * *
Posibleng kaatbang ni Carpio sa 2028 utro sang nagpa-goryo-goryo. Si House Speaker Martin Romualdez nikuyog sa tanang biyahe ug nanegurong maapil sa tanang letrato sa iyang ig-agaw nga si Presidente Ferdinand Marcos Jr. Pero niinsistir nga wa siyay ambisyon nga mag-presidente.
Nipasalig si Romualdez nga nagtuman lang sa iyang trabaho isip speaker pero gipanginlabotan ang tanang isyu nga makapahumot niya sa mga botante, gipalambo ang iyang pagkontrolar sa print ug broadcast media, ug gitangtangan si Carpio sa tanang pundo nga mahimong makatabang sa pagpangandam sa umaabot nga mga eleksiyon.
* * *
Silang Carpio ug Romualdez, gawas ni Duterte, dunay laing idolo sa kamat-an sa politiko: Si kanhi presidente Gloria Macapagal Arroyo. Kinsa, human gipasanginlan sa daghang eskandalo nideklarar nideklarar niadtong 2002 nga di siya modagan pagka presidente sa 2004 aron di mosamot pagkabuak-buak ang nasud.
Pero nisukwahi sa iyang pahibawo ug nipilde si anhing Fernando Poe Jr. Pinaagi sa giisip nga usa sa labing lang-og sa maniobra sa eleksiyon: Pagpatabang niya ni kanhi Comelec Commissioner Virgilio Garcillano sa gikaintapang “Hello Garci” scandal.
* * *
Silang Carpio ug Romualdez igo lang sab nga nagsunod sa tambag sa mga nag-una nila sa duyan: Ang pagpangandam sa kandidatura pagka presidente angayng himuon dayon usa ka adlaw human sa gisundang eleksiyong presidensiyal.
Maong wa mag-usik sa panahon ang duha nga pulos nangambisyon nga maoy mobanos ni Marcos Jr. sa Malacañang lima ka tuig gikan karon. Hinakalimtan nga pulos sila mga sakop sa alyansa nga panaghiusa maoy gisangyaw nga plataporma. Ug unsa may mas tukma nga pagsugod sa ilang kampanya gawas sa, nakatag-an ka, pagdeklarar nga di sila interesado.
- Latest
