Liniwatay sa kamabaw
Liwat si Bise Presidente Sara Duterte Carpio sa iyang amahan. Mosulti bisan unsay masud sa iyang hunahuna. Sa way pagpalandong, tungod sa kakuwang sa panahon o katakos, unsay kahulogan sa iyang mga sulti.
Bugtong kalainan mao nga ang iyang amahan nangunay sa pagbandilyo sa iyang mga pataka. Nagpahimus sa nasudnong telebisyon nga way kapilian gawas sa pagsibya sa way kinutobang mga diskurso atol sa iyang termino. Ang anak nagsalig sa mga tigpamaba ug ghost writers. Mas makalibog pa g’yung mga mensahe sa talagsaong mga higayon nga nibuka sa iyang baba.
* * *
Ang sinuwat nga pamahayag ni Bise Presidente Carpio nga nibakwi sa iyang pagpangayo og confidential funds padayong nilihay sa tinuod nga mga sukaranan sa kontrobersiya:
• Nganong mas importante man ang ?650 milyones nga confidential funds para sa iyang mga opisina kay sa mas importante ug dinaliang panginahanglan sa pagpalig-on sa mga ahensiya nga aktuwal nga nanalipod sa West Philippine Sea ug sa nasudnong seguridad?
• Giunsa man paggasto sud lang sa 11 ka adlaw hangtod sa kataposang usa ka dako ang kuwestiyonable niyang ?125 milyones nga confidential funds niadtong 2022?
* * *
Taphawng iyang palusot pag-surender sa confidential funds: Nakapabuak sa nasud ang isyu ug nanumpa isip bise presidente pagpabiling “peaceful” ug “strong” sa nasud. Gisubli ni Atty. Ted Te, kanhi tigpamaba sa Korte Suprema, ang oath of office ni Carpio ug, tinuod, wa maglakip sa “peaceful” ug “strong”:
“I do solemnly swear that I will faithfully and conscientiously fulfill my duties as Vice-President of the Philippines, preserve and defend its Constitution, execute its laws, do justice to every man, and consecrate myself to the service of the Nation. So help me God."
* * *
Bugtong nakalabaw sa kamabaw sa pasabot ni Carpio ang pagdupa ni Senador Bato dela Rosa: Nga ang paghimong zero sa budget ni Carpio makapa-inutil sa iyang opisina.
Maayo na lang nga si Cielo Magno, nga gitaktak ni Presidente Ferdinand Marcos Jr. sa Gabinete human nikuwestiyon sa price control sa bugas humay niadtong Septiyembre, nakahatag dayon og kuwentada: ?2.385 bilyones ang budget sa Office of the Vice President sa sunod tuig; kon kuhaan sa confidential funds, mabinlan pa og ?1.885 bilyones, di zero.
- Latest
