Paukyab ug pangawat

Sukwahi sa ilang pagarpar, mabantang ang priorities sa administrasyon ni Presidente Ferdinand Marcos Jr. sa ilang paagi sa paggasto sa atong buhis: Way kuwarta sa pagtukod og dugang classrooms ug pagkuha og dugang mga magtutudlo; pero nahurot og gasto ang P125 milyones nga confidential funds ni Bise Presidente Sara Duterte Carpio sud lang sa 19 ka adlaw.

Mas ganahan ning administrasyona og mga gasto nga way resibohay ug katagoan gikan sa publiko kay sa pagpalambo sa kalidad sa sistema sa edukasyon para sa mga bata nga maoy ugma sa nasud.

***

Lahi sa ilang pasalig, ang tinuod nga direksiyon sa administrasyon maklaro sa ilang gisugyot nga budget sa sunod tuig 2024: Gilaslasan og P10 bilyones ang budget sa Department of Health (DOH) samtang gi-umintohan og P120 milyones ang confidential ug intelligence funds (CIF).

Ulug-ulog rang gisaad nga dugang benepisyo sa healthcare workers ug pagpatuman sa Universal Health Care Act, nga ni-garantiya og libreng tambal, ospital ug doktor para sa tanang Pilipinhon, kay palabihon ang dugang pagpangespiya ug pagpaburot sa pribadong mga bulsa kay di masubli sa Commission on Audit (COA).

***

Bisan sa pagdani sa langyaw’ng mga negosyante nga mas takos ang mga gradwado, laslasan og P6.2 bilyones ang budget sa state universities ug colleges (SUCs) sa 2024 samtang umintohan og 1,000% ang budget sa mga biyahe sa presidente sa ubang kanasuran.

Para sa administrasyon, mas importante kay sa pagpalambo sa mga makat-onan sa atong mga trabahante ang way kinutoban nga laag sa presidente ug sa mga sakop sa iyang pamilya ug tanang higala.

***

Balit-ad sa saad pagpahiyos sa wa kinahanglana nga mga tambok sa burukrasya, nitudlo ang Malakanyang og 12 ka assistant secretaries sa Presidential Communications Office (ikaduha ra hinuon sa 21 ka assistant secretaries sa Department of Social Welfare and Development). Wa ra sa kumingking ang lima ka assistant secretaries sa DOH.

Human sa tanang saad pagpalambo sa kahimsog sa publiko ug pagpanalipod nila gikan sa mga sakit, mas ganahan ang administrasyong Marcos nga nindot nga pagkatagik, pagkahan-ay ug pagkasangyaw ang mga mensahe nga nagdayeg sa presidente ug ubang mga opisyal, bahala na kon wa motukma sa aktuwal nilang nahimo.