Niliwat sa giliwatan
Administrasyon ni Presidente Ferdinand Marcos Jr. nipakita na og mas daghang timaan kinsay giliwatan. Nagkataas nang lista sa mga ebidensiya sa pagwaldas sa buhis sa katawhan bisan sa mga ulug-ulog nga di pasagdan ang mga kabos.
Naapil sa listahan ang parties, pagsakay ni Marcos sa ayroplano sa Philippine Air Force (PAF) aron pagtan-aw sa Formula One Grand Prix sa Singapore sa niaging tuig ug ang pagpasiugda ni Unang Ginang Liza Araneta Marcos sa 65-piece fashion show sa Malacañang sa niaging semana.
* * *
Dakong eskandalo ang pag-usik-usik taliwa sa bangis nga mga katalagman. Nga nikalas og mga kinabuhi, nakagusbat og mga kabtangan ug nakapilde sa panginabuhi sa kaliboan ka molupyo, labi na sa mga mag-uuma ug mangingisda.
Mas law-ay ang kiat-kiat tungod sa kapakyas sa administrasyon pagpaubos sa presyo sa inadlawng mga palaliton ug pagsulbad sa mga krisis sa asukar, sibuyas, itlog, ug bugas humay.
* * *
Nagka-awop ang paglaom nga ang anak naleksiyon sa mga sayop sa mga ginikanan. Kay nagharab-harab siyang nisunod sa pangabuso sa gahom sa duha ka dekada nilang diktadura. Atong luna igo rang makalista sa mosunod:
• Sa Septiyembre 1985, lima ka buwan sa wa pa palayasa sa EDSA People Power Revolution, si Imelda nangulo sa disco sa presidential yacht “Ang Pangulo” diin si Marcos Jr., uban ang kasayuran nga bangkarota nang nasudnong ekonomiya, nagkatawa nga nikanta sa mga linya nga “There are people dying, it’s time to lend a hand” sa “We are the World”;
* * *
• Sa 1973, atol sa ika-56 nga birthday ni anhing Ferdinand Marcos Sr. sa Malacañang, gisugo ni Imelda ang gatosan ka sundawo uban sa mga heneral, nga gipangulohan nilang Fabian Ver ug Fidel Ramos, sa pagbutang og makeup ug pagsul-ob og saya ug bra isip kabahin sa programa (matod ni kanhi Defense Minister Juan Ponce Enrile napugos sa pagsunod ang mga sundawo); ug
• Sa 1983, gipaukyab ni Imelda ang kasal nilang Irene ug Greggy Araneta aron pag-ambas sa royal wedding nilang Prince Charles ug Diana sa 1981, nigasto og kapin sa ?584 milyones paghimo sa Sarrat, Ilocos Norte, nga morang lungsod sa Espanya ug gipasul-ob ang mga molupyo sa colonial costumes sa Cultural Center of the Philippines.
- Latest
