Eskandalong ginganlan og Kongreso
Palihug ayaw saligi ang akong mga numero. Mas maayo kon mohimo sa imong kaugalingong kuwentada. Akong pakisaw-an ang bugtong ihap sa mga adlaw nga nag-sesyon ang atong Kongreso. Di ni nila kasagaran nga ipahibawo. Kay mabantang man nga mas taas ang ilang bakasyon kay sa trabaho.
Nahapitan og lista ang mosunod nga mga numero sa pagpasidungog sa mga sakop nga way absent sa mga sesyon: Dunay 144 ka session days sa kapin sa duha ka tuig sa 18th Congress, o gikan sa Hulyo 22, 2019 hangtod sa Agosto 25, 2021.
* * *
Kon subayon ang kalendaryo, dunay 765 ka adlaw sa pagsugod sa sesyon sa Hulyo 22, 2019 hangtod sa pagtapos sa Agosto 25, 2021. Pila ra man ka porsiyento ang 144 ka adlaw nilang sesyon? Palaban sa imong calculator pero ang Google calculator nihatag og masulub-ong numero: 18.82%.
Sa ato pa, sa kada napulo ka adlaw wa ra kaabot og duha ka adlaw ang sesyon sa atong Senado ug House of Representatives. Sa lain nga pagkasulti, sa kada napulo ka adlaw, kapin sa walo ka adlaw ang ilang bakasyon.
* * *
Kapin sa ?300,000 ang binuwan nga suholan sa kada kongresista ug senador. Mas modako ang suweldo samtang magkadako ang ranggo. Mas dako pa g’yung allowances sa pagbiyahe gikan ug padung sa ilang mga pinuy-anan ug mga distrito ug mga buhatan.
Mas makalilisang ang ilang pork barrel funds nga wa ilista sa nasudnong budget. Pero nahibawo tang tanan nga dunay minilyon ka pesos nga balor sa mga proyekto kada tuig. Nga silay magpili asa ipatuman, kinsay kontraktor ug pilay komisyon.
* * *
Palihug ikumparar ang kadagko sa ilang suweldo ug kagaan sa trabaho ngadto sa kalidad sa ilang produkto. Isip mga magbabalaod, ang prinsipal nilang obligasyon mao ang pagpanday og mga balaod nga mosulbad sa mga problema sa katawhan ug mopambo sa nasud.
Di nato hisgutan ang balaod nga napanday pila ka tuig ang nilabay pero giusab karong tuiga kay napamatud-ang sayop diay (ASIN Law) ug balaod nga wa ra abti og tuig (AFP fixed term law). Susihon na lang nato ang bag-ong napasar nga Maharlika Investment Fund bill. Nga direktang nagsukwahi ang Sections 50 ug 51.
- Latest
