Pagpahiyos ug pagpaburot
Ang kampo ni House Speaker Martin Romualdez maoy unang nipabuto. Ang kampo ni kanhi presidente Gloria Macapagal Arroyo maoy nipasilaob sa kayo. Kon unsa may gustong barawon ni Romualdez sa iyang pagtangtang ni Arroyo gikan sa ikaduhang labing taas nga katungdanan sa House, giseguro ni Arroyo nga mas modako pa.
Gipagawas sa kampo ni Romualdez nga gitangtang si Arroyo pagka senior deputy speaker aron kaibanan ang daghan niyang trabaho. Gipabuto ni Arroyo nga ang tinuod nga rason sa iyang pagkataktak mao nga gipasanginlan siyang nagplano paglusad og kudeta batok ni Romualdez.
***
Bisan si Presidente Ferdinand Marcos Jr. niapil og pahiyos sa problema. Gipasaligan ang mga sakop sa media nga ang duha niya ka termino pagka kongresista nagtudlo niya nga normal sa House ang matag karon ug unya nga lahugay. Agad sa unsay gusto sa speaker.
Gi-alkontrahan ni Arroyo ang pagsuway pagpagamay sa kontrobersiya. Gipahibawo dayon ni Bise Presidente Sara Duterte Carpio ang irrevocable resignation isip chairwoman sa Lakas Christian Muslim Democrats (Lakas-CMD). Ang partido nilang Arroyo ug Romualdez nga gisakyan ni Carpio sa iyang kandidatura pagka bise presidente sa 2022.
***
Gipagamay sa Lakas-CMD ang resignasyon ni Carpio pinaagi sa pag-ulug-ulog niya. Ug pagpaningil sa iyang pasalig sa panaghiusa para sa kalamposan sa administrasyong Marcos. Nagpa-goryo-goryo sab si Marcos nga ni-resign si Carpio aron makatutok sa DepEd ug NTF-ELCAC.
Atubangan sa paglab-as sa suporta sa Lakas-CMD, National Unity Party (NUP) ug Nationalist People’s Coalition (NPC), gilaoman ni Romualdez nga gamay rang tay-og sa resignasyon. Bisan sa pagbundak ni Carpio nga “execrable political power play” ang nakapabiya niya.
***
Pero dunay laing alas si Arroyo. Gi-post niya sa Facebook ang letrato nilang Carpio. Human sila naniudto niadtong Biyernes. Kuyog nila ang negosyanteng si Manny Pangilinan nga maoy nibangka para sa ilang birthdays. Pila lang ka oras human sa pahibawo ni Carpio sa iyang resignasyon. Duha ka adlaw human gi-demote si Arroyo. Usa ka adlaw human niangkon nga gidudahan siyang mag-kudeta.
Ambot unsaon sa pagpagamay sa Malacañang ang mensahe ni Arroyo. Nga nagpabiling lig-on ang ilang alyansa ni Carpio. Ang samang alyansa nga nakapalagpot sab og speaker sa House of Representatives lima ka tuig ang nilabay.
- Latest
