Misteryo sa asukar

Mahimo ra nilang usab-usabon ang mga numero. Aron ma-usab-usab sab ang ilang mga plano. Ug masaligon sila nga magyangu-yango ra ang publiko.

Mao ni nahitabo sa imbentaryo sa asukar. Nipasalig sila nga igo na ang importasyon sa 440,000 metric tons. Aron mapaubos ang presyo sa mga tindahan. Nga bisan sa tanang pasalig nagpabiling taas. Ug aron molahutay ang suplay sa tibuok tuig.

Pero sa tigom sa Sugar Regulatory Administration (SRA) niadtong Lunes, niingon na sab nga kuwang pa diay ang suplay. Kinahanglang mo-import og dugang 1,500 metric tons.

* * *

Way bisan usa sa mga opisyal nga nitambong sa tigom ang nagtagad sa pagpasabot. Nganong igo nang suplay sa ilang pagpirma sa Sugar Order No. 6 niadtong Pebrero. Pero nikalit lang og kakuwang karong semanaha.

Way bisan usa nga nahibung sa pagka-usab sa mga numero. Bisan, o tungod ba kaha kay, nitambong sa tigom silang Presidente Ferdinand Marcos Jr., nga isip Agriculture secretary maoy tsirman sa SRA board, Executive Secretary Lucas Bersamin, ug presidential legal counsel Juan Ponce Enrile.

Igo lang gipahibawo ang desisyon. Nga kinahanglang dugangan ang importasyon.

* * *

O tingali mabinantayon lang ang Malacañang. Nanagana. Nga ang paghatag og dugang kasayuran makatukas na hinuon. Sa dugay na nilang gitan-ogan nga misteryo sa importasyon sa asukar.

Kay hangtod karon wa pa g’yud silay tubag. Bisan ek na lang. Sa dul-an sa tulo ka buwan nang exposé ni Senador Risa Hontiveros. Nga nidunggo sa pantalan sa Batangas ang asukar gikan sa Thailand niadtong Pebrero 9. Unom ka adlaw sa wa pa pirmahing Sugar Order No. 6 sa Pebrero 15.

* * *

Wa maapil sa gilista sa Malacañang nga nanambong sa tigom sa SRA niadtong Lunes si Agriculture Senior Undersecretary Domingo Panganiban. Nga maoy ni-um-om sa tanang responsibilidad sa mas sayo nga importasyon. Ug sa pagpili sa tulo ka kompaniya nga mag-piyesta sa importasyon.

Ambot gitagoan ba lang nila si Panganiban. Kansang presensiya labihan ka-importante. Kay mao ray gipaabot sa mga sakop sa Senate Blue Ribbon Committee. Aron kasugdan ang imbestigasyon sa giingon ni Hontiveros nga state-sponsored sugar smuggling.

O gilawog na si Panganiban sa tirong. Maong wa na paapila sa umaabot nga, misteryuso sab, nga mga transaksiyon.