Pagpahiyos sa ASF sa Sugbo
Daghang mahimo ang mga opisyal sa Sugbo sa pagpugong sa pagkatap sa mga kaso sa African Swine Fever (ASF) sa Carcar City ngadto mas daghang lugar ug pagpanakod sa kagaw sa mas daghang baboy. Pero ang mga eksperto sa pagduma sa outbreak di morekomendar sa pagtago sa kasayuran gikan sa publiko.
Nihit ang mga detalye sa unang pahibawo sa pagsud sa kagaw sa Sugbo: Positibo sa ASF ang mga baboy gikan sa Negros Island nga nasagol sa lokal nga mga baboy sa ihawan sa Carcar pero way hisgot pilay natakdan.
Dayon gipahibawo nga 11 sa 15 ka barangay sa Carcar ang naapektahan. Pero gibakwi pagka sunod adlaw nga tulo ra diay ka barangay. Nahisgutan sab nga 50 ka baboy ang natakdan ug ang pipila naihaw na. Ang Bureau of Animal Industry (BAI) nay nipahibawo nga 58 ang positibo sa 149 ka blood samples.
Way detalye kon giunsa ang mga karne nga may ASF. Napugngan ba samtang gipaabot ang resulta sa laboratory test? O nabaligya ug nakagawas sa Carcar? Unsay nahitabo sa nahibiling mga baboy nga kaipon sa mga natakdan?
Ubang kasayuran nga angay untang mahibaw-an sa publiko, aron makatabang sa pagkontrolar sa outbreak, pero wa ihatag sa mga ahensiya sa gobiyerno:
• Wa nganli ang mga barangay nga gigikanan sa natakdan nga mga baboy;
• Way klaro pila ka baboy ang nangasakit ug pila nay gipatay aron pagbadlong sa tinakdanay; ug
• Way naghisgot unsay posibleng kalabutan sa kaliboan ka baboy nga sunudsunod nga nangamatay sa Cadulawan, Minglanilla sa unang Disyembre sa niaging tuig.
Ang pagdumili sa gobyerno pagsangyaw sa hingpit nga kasayuran sa napamatud-an nang mga kaso sa ASF di makadasig sa publiko sa pagtabang. Mga tag-iya og baboy, imbes mosumbong nga masakiton ang ilang binuhi, peligrong mokopya sa ehemplo sa pagtago ug modalidali hinuon pagbaligya sa di pa mangamatay.
Mao tingaling way nituo sa pasalig sa Kapitolyo nga Carcar ray apektado ug luwas pang mga chicharon nga nahimo sa wa pay Marso. Ang silingang mga syudad ug lungsod sa Sugbo ni-ban sa tanang baboy ug produkto sa baboy sa Carcar. Ug ang kasilinganang mga probinsiya ni-ban sa tanang baboy ug produkto sa baboy sa tibuok Sugbo.
- Latest
