Boying diktador

Ning gipakitang dili makiangayong taras ug dili katuohang mga alegasyon ni Justice Secretary Crispin ‘Boying’ Remulla nga nagduot pag-ayo ni suspendidong Bureau of Correction (Bucor) Chief, General Gerald Bantag, kinsa wala pa gani maisyuhig subpoena, gihukman na ni Boying nga mao kunoy mastermind sa pagpatay ni radio commentator Percy Lapid, milutaw nga dili malinis ang iyang pagpangalagad isip maoy hari sa atong Department of Justice.

Wala makauyon ang nagpakabanang katilingban ning buktot estilo ni Boying, diin morag nahimo na hinuon siyang pribadong abogado sa pamilya ni anhing Percy Lapid. Sanglit, maoy nangunay sa pagpanghakot og mga ebidensiya batok sa inosenteng Gen. Bantag, bahala nag ang maong gipangyagyag niyang ebidensiya makaumol og anino sa mga pagduda unsa kini ka tinuod?

Dili na limpiyo si Boying. Sa iya lang pagpaugat nga magpabilin sa puwesto bisag nadakpan na iyang anak nga nagdalag mga bag sa marijuana, nakapahugaw na kaniya. Sa iyang hugtanong pagpili sa kanhi palpak Chief of Staff General Gregorio Catapang, suod higala ni anhing Pangulo Noynoy Aquino, diin sa pagpamunoan sa nasod maoy pag-bloom sa illegal drugs, nga maoy parelibohon sa gisuspending Gen. Bantag, kini nakapasamot sa kahugaw ni Boying.

Tinuoray, si Presidente Bongbong Marcos (PBBM) mao kunohay mi-appoint ni Catapang. Pero si Boying maoy kusganong mirekomendar – niining dilawang heneral nga may hugaw nang rekord sa SAF 44 sa kasaysayan. Nganong dili man limpyo ang gipuli? Nagpasabot ba nga hadlok og limpyong Bucor chief si Boying?

Ania pay pagpakita ni Boying nga siya lakas kaayo ni PBBM. Sa usa ka interbiyu, siya mipasiatab nga sa higayon kuno nga magkakita sila ni PBBM, iya kining sultian nga hingpit nang ipasibak si Gen. Bantag sa puwesto. Wowww!

Si Boying nga nagkahugaw na sa panan-aw sa katawhan, nakagahom pa pagdiktar ni PBBM? Kaya ra diay kaayo niyang madiktahan si PBBM?

Pastilan, matilawan pa kaha nato ang patas-limpiyong hustisya kon diha pa lang sa Department of Justice, ang nagdala sa renda dili na kasaligan ug daw gustong pang mohawod ni PBBM? Kaanugon sa pangandoyng ‘sabaysabay tayong babangon muli’, kon ‘ang nakabangon muli ay ang mga dilawan diay!’

Unta, ang tingog-tiyabaw sa katawhan maoy paminawon ni PBBM. Ug dili, si Boying!