Gipalabing pork barrel kay sa baha

Pila na ka dekada nga naproblema ang mga Sugbuanon sa grabeng baha kada bundak sa uwan. Pila na sab ka dekada nga nipasalig ang mga politiko nga nakakita na sila og sulbad. Pero hangtod sa niaging semana, dihang nagsugod na og panghasi ang bagyong Paeng, gibahaan gihapon ang dakong bahin sa Metro Cebu.

Hain na man ang sulbad sa mga politiko? Dali kaayo silang makawara-wara sa komprehensibo nga drainage plan. Nga naglakip sa paghawan, pagpadako ug pagpalawom sa mga kanal ug mga imburnal. Pero bisan sa tanang pagarpar wa mapatuman.

 * * *

Nahimo ang komprehensibong drainage plan pila na sab ka dekada ang nilabay. Dihang di pa sama kadasok ang mga molupyo ug istruktura sa Metro Cebu. Mao nga kinahanglan nang bag-uhon pagpahaom sa mas upaw nga kabukiran, mas init nga temperatura, mas daghang uwan, mas subsob ug mas kusog nga mga bagyo, mas daghang basura ug mas lapad nga kadagatan.

Nabahaw na lang ang plano nga wa mapatuman kay nagkinahanglan og binilyon ka pesos. Ug di andam ang mga politiko pagpalambo sa mga kanal nga di kabutangan sa ilang ngan ug dagway.

 * * *

Ang wa nila makit-i maoy gipabantang ni Director General Arsenio Balisacan sa National Economic and Development Authority: Mas dako ang kadaot nga mahiagoman sa nasudnong ekonomiya kon di mapahimutang sa labing daling panahon ang mga panagang batok mga katalagman.

Di kapugngan ang mga bagyo ug mga linog. Pero mahimong kaibanan kon man kalikayan ang kadaot nga ilang mamugna. Kon mobubo og pundo ang gobyerno pagpangandam sa wa pa, imbes nga magkara-kara kon moabot na, ang mga katalagman.

 * * *

Ang pundo nga girekomendar ni Balisacan maglakip sa binilyon ka pesos pagpatuman sa mas haom nga komprehensibong drainage plans. Di lang sa Metro Cebu kon dili hasta sa ubang mga sentro sa populasyon.

Pero si Balisacan, bisan Ilocano ug gibiliban ni Presidente Ferdinand Marcos Jr., usa lang sa economic managers. Nga gitudlo aron pagpahumot, di aron tumanon, sa administrasyon. Pananglitan, may binilyon ka pesos kada tuig ang Department of Public Works and Highways para sa flood control projects. Nga, nakatag-an ka, wa gamita batok sa baha, kon dili isip laing tinubdan sa pork barrel.