Unsay wa niya isulti sa UNGA
Sa iyang diskurso sa United Nations General Assembly (UNGA), gawas sa unang paghisgot sa iyang ngan ug pagka presidente sa Republika sa Pilipinas, gihisgotan ni Presidente Ferdinand Marcos Jr. ang kadako sa papel sa Pilipinhon nga healthcare workers sa pag-atiman sa mga pasyente sa Covid-19 sa nagkalainlaing kanasuran sa kalibotan.
Iyang giasoy ang pagrisgo sa ilang kahimsog, ug sa pipila ka higayon ang pagsakripisyo sa ilang mga kinabuhi, aron lang pagsalbar sa uban. Mas unang nakapasidungog sa kabayanihon sa mga Pilipinhong doktor ug nurses ang Estados Unidos, Britanya ug ubang kanasuran.
***
Sama sa naandan, di hingpit nga tinuod ang iyang gisulti. Iyang gitago gikan sa ubang kanasuran ang padayon nga panaugdaog sa healthcare workers sa atong kaugalingong nataran. Nga padayon pang nameligro sa pag-atiman sa nagsulbong gihapon nga mga pasyente sa Covid-19 sa mga ospital ug isolation facilities.
Ang wa hisguti ni Marcos Jr. mao ang duha ka laksot nga inhustisya nga gihimo sa atong gobiyerno batok sa healthcare workers. Ang una gipasiugdahan sa niaging administrasyon nga tungod sa pamolitika di niya mahimong sawayon ug ang ikaduha gipadayon sa iyang administrasyon.
***
Bisan sa kadako ug kadinalian sa panginahanglan sa ubang kanasuran sa pagsulbong sa pandemiya duha ka tuig ang nilabay, ug bisan sa kadaghan sa Pilipinhong healthcare workers nga nakatuman sa mga panginahanglan ug nakapirma og mga kontrata, wa sila palargaha sa administrasyon ni kanhi Presidente Rodrigo Duterte.
Gipabilin sila sa nasud aron maka-atiman sa mga pasyente nga nag-awas sa mga ospital. Pero kutob ra sa istorya ang gobyerno. Wa sila tanyagi og trabaho. Nag-antos ang ilang mga pamilya nga way panginabuhi sa kinatibuk-an sa pandemya.
***
Ang inhustisya nga gisugdan ni Duterte ug gipadayon ni Marcos Jr. mao ang gamayng suweldo ug langay nga mga benepisyo sa healthcare workers. Kataphaw sa burukrasya ang nakatanggong sa mga benepisyo nga para pa unta sa niaging tuig.
Sama sa niaging administrasyon, istorya ray tubag sa bag-ong pamunoan sa ilang awhag sa mas makiangayong suholan ug benepisyo. Laing wa isulti ni Marcos Jr. sa UNGA: Gidasig niya ang healthcare workers ug ubang OFWs sa pagbalik sa Pilipinas; pero gitanyagan sab niya sila og mas daghang trabaho sa ubang kanasuran.
- Latest
