Iwag taliwala sa kangiob

Ang retiradong polis nga si Arturo Lascañas di maoy unang nibarug batok sa Duterte Death Squad (nga iyang giingon maoy nahimong Davao Death Squad). Si Edgar Matobato mas unang namasangil ni Presidente Duterte atubangan sa Senado niadtong 2016.

Si Lascañas sa sinugdanan nisalikway ni Matobato. Pero pagka 2017 nibalitok si Lascañas. Gawas nga nidason ni Matobato nihatag pa g’yud og mas daghang detalye sa kapin sa gatos ka patay. Nga giingon niyang pulos sinugo ni Duterte, may mga kaso pa gani nga si Duterte ang nangunay pagpatay sa mga biktima.

* * *

Silang Matobato ug Lascañas di maoy labing unang nitulisok ni Duterte. Siya si alyas Crispin Salazar, taga Alabelya, Sarangani. Niangkon nga rebeldeng komunista sa 1979 hangtod 1987, si Salazar nipirma og affidavit niadtong 2009. Niasoy nga gisuweldohan siyang Duterte og ?15,000 sugod 1992 aron pagpatay sa mga durugista. Ug nga si Duterte ang niadto sa safehouse sa San Pedro, Davao City, uban sa listahan sa mga patyunon.

Way nahitabo sa testimoniya ni Salazar sa imbestigasyon sa Commission on Human Rights. Pero nitakdo sa sulti nilang Matobato ug Lascañas.

* * *

Si Lascañas ang nakahimo og kasaysayan. Siyay labing unang saksi nga gihatagan og immunity sa International Criminal Court (ICC) nga niimbestigar sa pasangil sa crimes against humanity batok ni Duterte. Di hinuon sayon ang iyang pagkumpisal.

Mahimong natakdan sa kaisog nilang Salazar ug Matobato. O nasuko dihang laktod nga gipatay ang duha niya ka igsuong lalaki nga gilambigit sa drugas. O gihamok sa dagway sa gamayng bata ug nagsabak nga inahan nga ilang giluba. O namahala tungod sa seryuso niyang sakit sa kidney.

* * *

Ang kutay sa mga panghitabo nga nakapalihok sa ICC mahimong di tsamba. Wa hinuoy puwersa sa yuta nga makahapnig pagpahiluna sa tanang panghitabo sa tukma nilang kapahimutangan. Dunay mas dakong gahom nga motino nga ang kaayuhan mopatigbabaw sa kadaotan.

Silang Salazar, Matobato ug Lascañas di maoy una. Nakaseguro ko nga di sila maoy kataposan. Mas daghan pa, nga wa nato matagad ug malingi, nga bisan sa tanang panghudlat ug panghaylo naghupot og kaligdong. Ug nakaangkon og kaisog pagpili sa kahayag. Taliwa sa kangiob sa ka way kaseguroan sa dangatan sa ilang pakigbisog.