Krisis sa lana, krisis sa liderato
Si Energy Secretary Alfonso Cusi nga mao untay labing sinaligan sa administrasyon ni Presidente Rodrigo Duterte sa pagbantay sa industriya sa lana, nigahin og mas dakong panahon sa pamolitika mao nga ang katawhang Pilipinhon nahikawan sa tarung nga liderato:
• Wa siya igkita sa pagkahitabo sa blackout sa Luzon niadtong Hunyo ning tuiga kay gipalabi ang pagduma sa di kaayo sekretong maniobra pagpalagpot ni Senador Manny Pacquiao gikan sa PDP-Laban; ug
• Wa kahimo og tukma nga mga pangandam sa paglumpayat sa presyo sa lana sa siyam na ka sunudsunod nga semana karong semanaha kay nahurot ang panahon pagtugpo og mga kandidato pagka presidente ug pagka bise presidente nga pulihan ra unya o sa di pa ang Nobyembre 15.
* * *
Igo lang nangayo og pasaylo si Cusi sa way pag-angkon og responsibilidad sa kapakyas pagpugong sa blackout sa Luzon. Gitapakan ang kauwahi niyang nilihok sa pagsagang sa daotang epekto sa mas mahal nga lana ngadto sa transport groups ug mga pasahero ug mga konsumidor pinaagi sa:
• Pagkopya sa mga pasidaan sa langyawng mga eksperto sa industriya sa lana nga ang sunudsunod nga pagsaka sa presyo sa lana hangtod pa sa kataposan ning tuiga; ug
• Pagkopya sa dugay nang awhag sa mga lider sa oposisyon, nga kay hapit na mang eleksiyon gidasonan na sab sa mga alyado sa administrasyon, nga pagsuspenso sa excise tax sa lana ug pagbalik sa pag-regulate sa industriya sa lana.
* * *
Ang kabanga ni Cusi sa iyang trabaho sa gabinete karibalan lang sa kalang-og sa resulta sa naghinobra niya nga pamolitika:
• Way klarong mga kandidato pagka presidente ug pagka bise presidente ang partido nga giilog sa administrasyon ni Presidente Duterte gikan nilang Pacquiao ug kanhi Senate president Koko Pimentel;
• Wa gani makumplito ang ilang senatorial slate; ug
• Ang mga pangangkon ni Cusi nga si Presidente Duterte angay g’yung modagan pagka bise presidente ug nga si Senador Bong Go maoy labing takos nga mag-presidente sayon kaayo niyang gibalibag sa kinadul-an nga kanal, gi-demote si Go ug kalit nga gitukmod si Senador Bato dela Rosa nga mao na sab diay ang labing takos nga mobanos sa pagduma sa nasud sa mosunod nga unom ka tuig.
- Latest
