Bugtong sumpa sa kauhaw sa dugo
Way ikapakita ang Malakanyang nga ebidensiya sa pasalig nga takos ang sistema sa hustisya sa Pilipinas pagsusi sa mga pasangil sa laktod nga pagpamatay sa mga biktima sa kampanya batok sa ilegal nga drugas ni Presidente Duterte sukad sa 2016 ug samang bangis nga pinatyanay sa Davao Death Squad (DDS) dihang siya pay mayor sa Davao City.
Di katabang sa palasyo ang pagtago sa kapolisan sa mga dokumento sa gikuwestiyon nilang mga operasyon ug ang kadaghan sa mga abogado, mga piskal ug mga huwes nga gipangluba sa niaging lima ka tuig.
* * *
Tungod sa pag-insistir ni Presidente Duterte nga ang mga operasyon batok sa ilegal nga drugas naglambigit sa nasudnong seguridad, 52 ra ka case files ang gisumiter sa Philippine National Police (PNP) aron masubli sa Department of Justice (DOJ): 0.2% ra sa gibanabanang 27,000 ka patay sa duguong kampanya.
Sa iyang pasiunang report sa United Nations Human Rights Council niadtong Pebrero, giangkon sa DOJ ang mga atraso sa kapolisan: Wa masusi ang nakuhang mga armas; wa matino kinsay mga tag-iya; ug way gihimong ballistic ug paraffin tests.
* * *
Ang pipila ka kaso batok sa mga polis nga nakaabot sa korte naungot sab. Gawas sa naandang kaluya sa mga husay, laing posibleng rason maong pagpatay sa 61 ka abogado, piskal ug huwes sukad sa pagbanos ni Presidente Duterte sa Malakanyang. Mas makapaalarma kon ikumparar sa 49 ka abogado nga napatay sukad ni Ferdinand Marcos hangtod ni Noynoy Aquino.
Bisan sa pagpanginlabot sa Korte Suprema, Integrated Bar of the Philippines ug Senado, pito ra sa mga kaso ang aktuwal nga napasaka sa korte.
* * *
Maong abunda ang mga sukaranan sa International Criminal Court (ICC) sa pag-imbestigar sa mga pasangil sa crimes against humanity batok nilang Presidente Rodrigo Duterte ug sa iyang mga berdugo.
Usa nila mao nga lahi sa mga Pilipinhon nga nangahas pagbarug para sa hustisya ug kamatuoran, ang mga huwes sa ICC di mahulga, mapapriso, ma-quo warranto, mahudlat og impeachment ug matusaktusak sa bala sa pamunoan nga napakyas pagpalambo sa ekonomiya ug pagtapos sa kakabos, pangurakot ug kriminalidad pero nilampos pagmatuod sa way kinutoban nga kauhaw sa dugo ug kahangol sa gahom ug katigayonan.
- Latest
